ESB er reiðubúið að standa straum af öllum efnahagsþörfum Úkraínu, bæði hernaðarlegum og fjárhagslegum „eins lengi og þörf krefur.“ Þetta voru skilaboðin frá Ursulu von der Leyen, forseta framkvæmdastjórnar ESB í dag.
Norræna ráðið er með fund í Stokkhólmi í dag, Svíar fara með formennskuna núna. Sérstakur gestur var Ursula von der Leyen, forseti framkvæmdastjórnar ESB. Hún sækir einnig fund norrænu ráðherranefndarinnar síðar í dag.
Hampaði varnarsamningi við Noreg og Ísland
Ursula flutti opnunarræðu Norræna ráðsins og viðurkenndi beinlínis að ESB væri í stríði við Rússland:
„Pútín heldur að hann geti haldið lengur út en við. En honum mun ekki takast það.“
Ávarpið var stríðsávarp um samstöðu Norðurlanda með Úkraínu, því ef Pútín tekst að taka Úkraínu mun hann „í framhaldinu ráðast á önnur lönd í Evrópu.“ Von der Leyen greindi frá fjölþátta hernaði Rússa og sagði dróna vera á ferð og flugi á Norðurlöndum sem Rússar stjórnuðu og sömuleiðis skuggaflota Rússa á Eystrarsalti og óvinveittar rússneskar flugvélar sem fari inn í landamæri Eystrasaltsríkjanna. Hún hampaði sérstaklega samstarfi við Noreg og Ísland sem gerði ESB kleift að halda uppi vörnum langt fyrir utan landamæri ESB.
ESB tekur að sér að reka úkraínska ríkið eins lengi og þörf krefur
Mikilvægur boðskapur frá fundinum er að ESB, og sérstaklega Norðurlöndin, standi heilshugar að baki Úkraínu. Löndin lofa fullum fjárhagslegum stuðningi við hið stríðshrjáða land. Ursula von der Leyen:
„Við erum að skoða efnahagsþarfir Úkraínu fyrir árin 2026 og 2027 og ég er mjög ánægð og þakklát fyrir að Evrópuráðið hafi skuldbundið sig til að standa straum af efnahagsþörfum Úkraínu fyrir árin 2026 og 2027, hernaðar- og ef nauðsyn krefur fjárhagsþörfum.“
ESB vill nota frystar rússneskar eignir til að halda Úkraínu gangandi. Hugmyndin er að ESB og aðildarríkin muni lána Úkraínu peninga með veði í þessum eignum. Áætlunin er að Úkraína greiði lánið síðar til baka þegar Rússland hefur „samþykkt að greiða risavaxnar stríðsskaðabætur.“ Hins vegar, ef engar slíkar bætur verða greiddar, verða það skattgreiðendur ESB-landanna sem verða tilneyddir að greiða lánið, sem nemur yfir eitt þúsund milljörðum sænskra króna.
„Tæknilegt vandamál“
Öll lönd telja það ekki góða hugmynd að leggja hald á rússneskar eignir. Þýskaland, Frakkland og ekki síst Belgía, þar sem stór hluti rússneskra eigna er skráð á Euroclear, eru á öndverðum meiði. Ursula von der Leyen lítur á þessa andstöðu sem „tæknilegt vandamál“ sem leysist fljótlega. Von der Leyen:
„Boðskapurinn til Rússlands er mjög skýr: Við erum staðráðin í þessu litið til langs tíma. Við erum reiðubúin að standa straum af efnahagsþörfum Úkraínu, þannig að við styðjum Úkraínu eins lengi og þörf krefur.“
Sænski forsætisráðherrannn Ulf Kristersson gat ekki stillt sig að hrópa: „Ég er alveg sammála!“