Páll Vilhjálmsson skrifar um nýja bók Frosta Sigurjónssonar, Hitamál, á blog.is. Hann segir bókina eiga erindi til allra er vilja kynna sér loftslag- og samfélagsmál líðandi stundar. Í lok hvers 16 kafla bókarinnar er samantekt er gerir bókina handhæga til uppflettingar. Loftslagsmál stjórnmálamanna er þungur baggi á heimilishaldi Jóns og Gunnu sem þó bera sáralitla ábyrgð á losun gróðurhúsalofttegunda.
Páll Vilhjálmsson skrifar:
Trump, Guterres og Hitamál Frosta
Guterres aðalritari Sameinuðu þjóðanna sagði fyrir tveim árum að heimurinn væri að stikna vegna hlýnunar af mannavöldum. Trump Bandaríkjaforseti talar á hinn bóginn um ,,loftslagssvindlið.” Frosti Sigurjónsson ráðgjafi og fyrrum þingmaður teflir inn í umræðuna nýrri bók, Hitamál.
Í bókinni ræðir Frosti vísindin, hagfræðina, söguna, stjórnmálin og samfélagið í samhengi við helsta alþjóðlega þrætuepli þessarar aldar er má setja fram í spurningu. Ræður maðurinn ferðinni í loftslagsbreytingum jarðar?
Frosti kynnir í sextán köflum meginþætti álitamálsins. Hverjum kafla lýkur með samantekt er gerir bókina handhæga til uppflettingar. Hann vísar í skýrslur og vísindarannsóknir er draga upp raunsanna mynd af hættu á hamfarahlýnun af mannvöldum (hún er lítil) annars vegar og hins vegar risavöxnum kostnaði, bæði efnislegum og óefnislegum, í glímunni við vanda sem að stórum hluta er ímyndaður. Nálgun Frosta er í senn alþjóðleg og innlend.
Loftslagsmál stjórnmálamanna er þungur baggi á heimilishaldi Jóns og Gunnu sem þó bera sáralita ábyrgð á losun gróðurhúsalofttegunda. Frosti skrifar:
Samkvæmt Hagstofu Íslands greiddu heimilin 55% af umhverfissköttum árið 2023 eða 48,1 milljarð króna, aðallega í formi vega- og orkuskatta. Á vef Hagstofunnar kemur einnig fram að heimilin losa aðeins um 8% af heildarlosun hagkerfisins. Hækkanirnar vegna loftslagsskatta skila sér í verðlagið almennt og þar með hækka verðtryggðar skuldir heimilanna. Hver prósentuhækkun neysluvísitölu hækkar verðtryggðar skuldir heimilanna um tugi milljarða.
Loftslagsskattar skerða lífskjör. Það verður að blekkja fólk svo það mögli ekki. Til að viðhalda ímyndinni að Jón og Gunna beri sök á meintri loftslagsvá leggur ríkið milljónir ofan á milljónir í áróður til að valda loftslagskvíða íslenskra fjölskyldna. Frosti tilgreinir dæmi úr námsefni í grunnskólum sem Landvernd gefur út með styrk frá Loftslagssjóði:
Í ritinu [Okkar framtíð] er meðal annars ýjað að því að ekki sé heppilegt að kaupa föt og aðra hluti, fara í ferðalög eða borða kjöt. Börnin eru hvött til að vekja athygli á loftslagsmálum, taka þátt í mótmælum, skrifa greinar og ræða við fjölskyldu og vini um málin. […]
Í sömu ritröð er heftið „Hvað eru loftslagsmál“. Meðal verkefna nemenda í því hefti er að finna fjórar fréttir um loftslagsmál og gera úrdrátt úr þeim. Sýnidæmin eru m.a. svohljóðandi fyrirsögn af Vísi: „Flestir telja loftslagsbreytingar fela í sér neyðarástand“, og önnur fyrirsögn af RÚV: „Síðasta viðvörunin um loftslagsbreytingar“.
Illu heilli ríkir i landinu loftslagsríkisstjórn sem ekki er líkleg til að endurskoða námsefni sem á að heita náttúru- og samfélagsfræði en er veraldleg trúarbrögð án vísindalegrar innistæðu. Við verðum að bíða eftir að Miðflokkurinn fái stjórnartaumana í hendur til að eiga von á heilbrigðri skynsemi í stjórnarráðinu. Frosti greinir rót vandans:
Trúarlegar fórnarathafnir hafa lagst af en eftir sem áður virðist sú hugmynd býsna lífseig að röng hegðun geti haft slæmar afleiðingar fyrir loftslagið. Munurinn er kannski sá að nú eru það vísindamenn og stjórnmálamenn, fremur en trúarbrögð, sem útskýra hvað sé rétt hegðun og hverju þurfi að fórna til að afstýra loftslagsvánni.
Dramatísk orðræða um loftslagið hefur haft neikvæð áhrif á ungt fólk; loftslagskvíði og svartsýni um framtíðina eru orðin að sjálfstæðu vandamáli.
Að lokum má greina trúarlegar eða siðferðislegar hliðar á málefninu þar sem boðskapurinn virðist vera sá að rangar venjur og lífsstíll mannsins muni kalla yfir hann refsingu í formi hamfara.
Móðuharðindin, sem koma stuttlega við sögu í Hitamálum, voru á sínum tíma útskýrð, t.d. af Jóni eldklerki Steingrímssyni, sem guðleg refsing fyrir að menn lifðu í
sælgæti matar og drykkjar, sumir orðnir svo matvandir, einkanlegast þjónustufólk, húsgangslýður og letingjar, að ei vildu nema þá allra beztu og krydduðu fæðu, drykkjuskapur og tóbakssvall fór að sama lagi
Sjá menn ekki samhengið? Jón sagði í anda lútersks rétttrúnaður á 18. öld að aumingjarnir hefðu það of gott og væru á leiðinni til helvítis. Loftslagselíta samtímans kennir að eigi Jón og Gunna fjölskyldubíl og leyfi sér að skreppa með börnin til útlanda skapa þau helvíti á jörðu. Loftslagskirkjan með fullar hendur ríkisfjár kennir rétttrúnaðinn börnum sem fyllast tilvistarangist. Stjórnmálamenn, sem fjármagna loftslagskirkjuna, mæta í fjölmiðla og lýsa áhyggjum af vanlíðan ungmenna. Hringrásarhagkerfi skinheilagra vandlætara í hnotskurn.
Vísindamennirnir sem koma við sögu í Hitamálum Frosta hafa sumir verið nefndir í tilfallandi bloggi, t.d. Will Happer, Richard Lindzen og Judith Curry. Þau eru í efsta flokki fræðimanna. Frosti gefur sér einnig tíma til að ræða skúrkana. Til dæmis svindlarann Michael Mann, helsta höfund línuritsins sem kallað er hokkíkjuðinn og átti að ,,sanna” hamfarahlýnun. Mann var afhjúpaður sem falsfræðimaður. Hann fór sömu leið og falsfréttamenn RSK-miðla hér á landi; stefndi þeim sem flettu ofan af svindlinu. Loddarar eru sjálfum sér líkir, hvort heldur þeir heita Mann, Þórður Snær eða Aðalsteinn.
Hitamál Frosta Sigurjónssonar er bók sem á erindi til allra er vilja kynna sér loftslags- og samfélagsmál líðandi stundar. Bókin upplýsir og teflir fram staðreyndum sem menn ættu að hafa á hraðbergi; enn eru til álfar út úr hól sem halda að fjölskyldubíll Jóns og Gunnu sé alheimsvandi og skuli skattlega til samræmis.
Hér að neðan er hlekkur til að nálgast bók Frosta, hún fæst bæði í prentaðri útgáfu og sem rafbók.