Þýska Welt greinir frá því, að í Danmörku ræði stjórnmálamenn opið um að bjóða þýska og franska hernum að senda herdeildir til Grænlands vegna harðari tón Bandaríkjamanna um framtíð eyjarinnar. Samtímis segir Donald Trump að hann sé reiðubúinn að velja á milli Grænlands og Nató. Frakkland blæs á hugmyndir um franskan her á Grænlandi. Talsmaður frönsku ríkisstjórnarinnar segir það útilokað að senda hermenn til Grænlands.
Yfirlýsingar frá bandarískum leiðtogum hafa valdið usla í Kaupmannahöfn og leitt til þess að danskir stjórnmálamenn vilja að kallað verði eftir alþjóðlegri hernaðarviðveru sem fælingarmátt á Grænlandi. Rasmus Jarlov frá Íhaldsflokknum sagði í viðtali við danska sjónvarpsstöðina TV2:
„Það væri skynsamlegt að bjóða bandamönnum frá Frakklandi og Þýskalandi velkomna til að verja Grænland eins fljótt og auðið er, þannig að verð Bandaríkjamanna fyrir hernaðarinnrás yrði afar hátt.“
Hann hefur víðtækan stuðning frá öðrum flokkum. Pelle Dragsted, leiðtogi Sósíalistaeiningarinnar, segir í yfirlýsingu.
„Það getur bara ekki verið að þeir geti lent þyrlu í Nuuk og dregið upp bandaríska fánann. Við verðum að gera það öllum ljóst að það myndi koma til vopnaðra átaka ef Bandaríkjamenn myndu grípa til slíkra aðgerða.“
Stinus Lindgreen frá Radikale Venstre segir í yfirlýsingu.
„Alþjóðlegar herdeildir geta haft mikil táknræn áhrif, en vopnuð átök við Bandaríkin væru sjálfsmorð fyrir Danmörku.“
Sascha Faxe, talsmaður varnarmála hjá Græningjaflokknum kallar eftir raunverulegri hernaðarlegri fælingu:
„Þetta eru ekki lengur nein táknræn stjórnmál. Við erum undir raunverulegri árás.“
Dennis Flydtkjær frá Dönsku demókrötunum leggur hins vegar áherslu á nauðsyn samstarfs við Washington:
„Við höfum engan áhuga á að auka átökin og Bandaríkin hafa engan áhuga á að sprengja Grænland í loft upp.“
Mette Frederiksen forsætisráðherra og varar við því að árás Bandaríkjanna á Grænland myndi þýða endalok Nató og núverandi skipun öryggismála í Evrópu:
„Ef Bandaríkin ráðast á annað Nató-ríki, þá er því lokið.“
JD Vance, varaforseti Bandaríkjanna, sagði á blaðamannafundi í Hvíta húsinu:
„Ráð mitt til evrópskra leiðtoga og allra annarra er að taka mark á forseta Bandaríkjanna.“
Á sama tíma segir Donald Trump að hann sé meðvitaður um hvað hernaðarleg yfirtaka þýði. Hann segir í viðtali við New York Times án þess að skilgreina hvorn kostinn hann myndi velja:
„Þetta gæti orðið val á milli Grænlands og Nató. Atlantshafsbandalagið er í grundvallaratriðum gagnslaust án Bandaríkjanna.“
Trump segir við blaðið að eignarhald sé mjög mikilvægt og útskýrir að leigusamningar eða aðrir lagalegir samningar við Danmörku séu ekki áhugaverðir:
„Eignarhald veitir þér aðstöðu sem þú getur ekki fengið með því að skrifa bara undir skjal.“
Christophe Lemoine, talsmaður frönsku ríkisstjórnarinnar, segir við Anadolu:
„Að senda herlið til Grænlands kemur ekki til greina.“