„Tilbúnir að berjast í kvöld“ gegn Rússlandi
Yfirmaður þýska flughersins, Holger Neumann hershöfðingi, hefur vakið athygli fyrir harðorðar yfirlýsingar um hernaðarátök við Rússland. Í viðtali við breska dagblaðið The Telegraph sagði hann að Þýskaland væri reiðubúið að „berjast í kvöld“ ef aðildarríki Atlantshafsbandalagsins yrði fyrir árás. Holger Neumann sagði að ef Rússar réðust á eitthvert aðildarríki NATO myndu þeir mæta „eyðileggjandi loftárásum“ í hefndarskyni – sem beindust meðal annars að Kalíníngrad, Sankti Pétursborg, Kólaskaganum og Svartahafsflotanum.
„Að vera tilbúnir til að berjast í kvöld þýðir að ef einhver hringir í mig núna og segir að þessi staða sé komin upp, þá verðum við að vera tilbúnir strax – og það erum við“ sagði Neumann sem ekki ræddi um hvað gerðist síðast þegar Þjóðverjar réðust á Rússland.
„Ef til átaka kemur munum við verja hvern einasta þumlung yfirráðasvæðis okkar,“ sagði hershöfðinginn og lagði áherslu á að öll aðildarríki NATO nytu sömu verndar, hvort sem um væri að ræða árás á Eistland eða Bretland.
Ummælin endurspegla þá stefnubreytingu sem orðið hefur í þýskum öryggis- og varnarmálum frá því stríðið í Úkraínu hófst. Stjórnvöld undir forystu kanslarans Friedrichs Merz hafa aukið útgjöld til varnarmála verulega og stefna að því að efla herafla landsins á næstu árum.
Neumann sagði að þýski flugherinn væri þegar tilbúinn til að bregðast við og að NATO gæti beitt öllum 32 flugherjum bandalagsins í sameiginlegri varnaraðgerð. Hann lofaði jafnframt stuðningi við Bretland ef þess yrði óskað.
Gagnrýnendur telja að slíkar yfirlýsingar séu til þess fallnar að auka spennu milli Vesturlanda og Rússlands á viðkvæmum tíma. Þeir benda á að sífellt harðari orðræða frá evrópskum stjórnmálamönnum og herforingjum geti stuðlað að áframhaldandi vígvæðingu álfunnar og aukinni hættu á árekstrum stórvelda.
Þrátt fyrir harða tóninn varaði Neumann einnig við því að vanmeta hernaðarmátt Rússlands. Hann sagði að rússneski herinn hefði sýnt mikla aðlögunarhæfni í stríðinu í Úkraínu og að NATO yrði að taka alvarlega þá hernaðargetu sem Rússar búa yfir, þar á meðal háþróaðar orrustuþotur, stýriflaugar og langdræg vopnakerfi.
Ummælin koma á sama tíma og umræða um hervæðingu Evrópu, aukin varnarmálaútgjöld og möguleg átök milli NATO og Rússlands verður sífellt fyrirferðarmeiri í evrópskri stjórnmálaumræðu.