Testósterón eða estrógen fyrir einstaklinga undir 18 ára aldri sem telja sig tilheyra gagnstæðu kyni verður bannað innan opinbera heilbrigðiskerfis Bretlands National Health Service (NHS). Bannið kemur í kjölfar úttektar á heilbrigðisþjónustunni þar sem komst var að þeirri niðurstöðu að „fyrirliggjandi gögn styðji ekki áframhaldandi notkun“ þessara lyfja.
Svokölluð kynstaðfestandi hormón eru stundum gefin einstaklingum sem telja sig vera transkynja. Nýja bannið felur í sér að sjúklingar sem þegar taka hormónin geta haldið meðferðinni áfram, en engar nýjar tilvísanir verða samþykktar. Bannið nær þó ekki til einkarekinna heilbrigðisþjónustuaðila.
Samkvæmt prófessornum James Palmer, læknisfræðilegum framkvæmdastjóra NHS í Englandi, þá hafði heilbrigðisþjónustan óskað eftir ítarlegri yfirferð á öllum tiltækum klínískum gögnum um notkun estrógens eða testósteróns við meðferð kynjamisræmis og kynáttunarvanda. Hann segir:
„Þessi úttekt hefur komist að þeirri niðurstöðu að fyrirliggjandi gögn styðji ekki áframhaldandi notkun karlgervandi eða kvenvæðandi hormóna til meðferðar við kynjamisræmi eða kynáttunarvanda hjá ungmennum undir 18 ára aldri. Við erum núna að hefja opinbert samráðsferli um endurskoðaða stefnu sem felur í sér að NHS hættir að bjóða þessa meðferð sem hefðbundið úrræði fyrir ungmenni undir 18 ára aldri.”
Kynþroskahemlar
Dr. Hilary Cass, sem stýrði úttekt á þjónustu við börn í tengslum við kynjamál sem leiddi til banns við kynþroskahemlum, hvatti til „ýtrustu varfærni“ við notkun lyfja sem tengjast kynskiptum. Hún komst að því að nær öll börn sem fá kynþroskahemlandi lyf halda síðan áfram að taka hormón sem ætlað er að breyta kynbundnum líkamseinkennum.
Á meðan kynþroskahemlar bæla hormón sem styðja við þroska líkama og heila barns, hjálpa hormónalyf einstaklingi að breyta líkamlegu útliti sínu, til dæmis með því að valda vexti skeggs eða brjósta.
Lyfin hafa verið aðgengileg einstaklingum sem eru 16 ára eða eldri síðan Dr. Cass birti úttekt sína árið 2024. Þar sagði hún að þörf væri á „skýrri klínískri röksemd“ fyrir því að gefa hormón á þessu stigi í stað þess að bíða þar til einstaklingur nær 18 ára aldri.
Langtíma neikvæð áhrif
Dr. Alice Hodkinson, stofnandi baráttuhópsins Biology in Medicine, fagnar ákvörðuninni og segir að í mörg ár hafi verið vitað að kynhormónar geti verið skaðlegir fyrir öll börn undir 18 ára aldri:
„Kynhormónar verða ekki skyndilega minna skaðlegir á 18 ára afmælisdegi sjúklings. Sífellt fleiri vísbendingar benda til langtíma neikvæðra áhrifa, þar á meðal hjartasjúkdóma, heilablóðfalls og aukinnar hættu á ótímabærum dauða.
Fyrir alla aldurshópa eru einnig miklar áhyggjur af aðgengi að ólöglegum lyfjum í gegnum einkaaðila og í gegnum glufur innan Evrópusambandsins, þar sem sjúklingar fá aðgang að lyfseðilsskyldum hormónum frá einkum Spáni og Írlandi auk notkunar á ólöglegum vefaukandi sterum sem eru keyptir beint af vefsíðum. Við vonum að ríkisstjórnin grípi til aðgerða gegn öllum þessum hormónagjöfum til að vernda viðkvæma hópa barna og ungs fólks fyrir óheiðarlegum aðilum.”