Núna standa yfir eldhúsdagsumræður á Alþingi og fyrst talaði Guðrún Hafsteinsdóttir, formaður Sjálfstæðisflokksins og gerði grein fyrir afstöðu Sjálfstæðismanna sem grundvallast á sjálfsákvörðunarrétti Íslendinga sem tryggður var með stofnun fullvalda lýðveldis á Þingvöllum 17. júní 1944. Að ráða örlögum sínum sjálfir er farsælasta stjórnarfar á Íslandi. Athygli vekur að hún er eini flokksforinginn sem tekur þátt í eldhúsdagsumræðunum. Enginn annar flokksformaður tók þátt í umræðunum.
Guðrún benti á að niðurstöður sveitarstjórnarkosninganna á dögunum hafi sýnt á skýran hátt hvaða mál brenna á fólki. Kjósendur vilja sjá stjórnmálin beina sjónum að þeim málum sem snerta daglegt líf þeirra mest; fjölskyldumálum, menntun, húsnæðismálum, samgöngum, öryggi og ábyrgri meðferð opinbers fjár. „Fólk kallar eftir því að skattfé þess sé nýtt af skynsemi og að stjórnvöld skili raunhæfum árangri,“ sagði Guðrún Hafsteinsdóttir í upphafi ræðu sinnar í eldhúsdagsumræðum Alþingis nýverið.
Guðrún sagði jafnframt að leiðin út úr verðbólgu og háum vöxtum lægi fyrir. Að hennar mati væri hvorki krónan orsök vandans né evran lausnin. „Evran er ekki töfralausn á þeim áskorunum sem við stöndum frammi fyrir,“ sagði hún og lagði áherslu á að ríkisstjórnin þyrfti að draga úr útgjöldum, hætta að færa kostnað yfir á heimili og atvinnulíf, einfalda regluverk og skapa fyrirtækjum betri starfsskilyrði.
Þá vék hún að Evrópusambandsmálinu og sagði ljóst hvað fælist í hugsanlegri aðild:
„Enginn getur haldið því fram að innihald málsins sé óljóst. Óvissan snýst fyrst og fremst um hvað stjórnvöld eru tilbúin að láta af hendi og hvaða ávinning þau telja sig fá í staðinn.“
Hún gagnrýndi ríkisstjórnina fyrir að leggja ofuráherslu á Evrópusambandsmálið á sama tíma og efnahagsmál, grunnþjónusta og dagleg verkefni heimilanna krefðust úrlausna. Guðrún ítrekaði að Sjálfstæðisflokkurinn styddi náið samstarf við Evrópu en hafnaði því að ákvörðunarvald yfir lykilmálum íslensks samfélags flyttist úr landi:
„Við viljum eiga gott samstarf við Evrópuríkin. Hins vegar viljum við ekki að endanlegt vald yfir fiskveiðum, landbúnaði, tollamálum, viðskiptastefnu og framtíð íslensks atvinnulífs færist frá Íslandi til annarra.“
Að lokum hvatti hún kjósendur til að hafna aðildarferli að Evrópusambandinu í þjóðaratkvæðagreiðslunni sem fram fer 29. ágúst.
Hún lagði áherslu á að almenningur eigi rétt á skýrum og heiðarlegum upplýsingum áður en tekin verður afstaða til jafn mikilvægs máls. Ekki gengi að stjórnvöld segðu þjóðina eiga lokaorðið en veittu henni á sama tíma ekki fullnægjandi upplýsingar um það sem hún væri beðin um að taka afstöðu til.