Evrópsk fyrirtæki eru tilneydd að greiða gríðarlegar fjárhæðir vegna vaxandi reglugerðafargans ESB. Samkvæmt framkvæmdastjórn Evrópusambandsins nemur kostnaðurinn 150 milljörðum evra árlega – sem jafngildir tæplega 22 þúsund milljörðum íslenskra króna. Ný lög munu nær tvöfalda skattpíninguna sem rætt er um að hækka um 120 milljarða evra og heildartalan fer þá upp í 39 billjónir árlega!
Frá þessu greinir sænski netmiðillin Fokus sem líkir ástandi fyrirtækjarekenda við uppreisn gegn grænum gjöldum ESB. Búist er við að ný lög muni auka núverandi skattpíningu enn frekar. Efnahagsráðherra Danmerkur, Stephanie Lose, segir að væntanleg löggjöf gæti kostað fyrirtæki og yfirvöld 120 milljarða evra til viðbótar á ári, um 17 billjónir sem bætast við núverandi 22 billjónir. Viðbótin er meðal annars fyrir GDPR, loftslagsmarkmið og Natura 2000 svæði.
Brussel hefur nú gengið svo langt að jafnvel mestu stuðningsaðilar ESB eru farnir að nota orð eins og „afnám reglugerða og einföldun” til að minnka skattpíningu ESB. Er það einnig vegna þess að sífellt fleiri ríkisstjórnir aðildarríkja ESB finna fyrir íhaldsflokkum á hælum sér.
Sænski ESB-þingmaðurinn Tomas Tobé frá Móderötum, sem sjálfur greiðir atkvæði með mörgum af frumvörpunum, segir við Fokus:
„Við höfum hægrisinnaða popúlíska flokka með skýra forystu í skoðanakönnunum í öllum helstu löndum Evrópu.”
Aðrir sænskir flokkar á ESB-þinginu eins og kratar ríghalda í reglugerðir ESB. Sænski sósíaldemókratinn Johan Danielsson, varar til dæmis við því að rífa upp reglur sem samþykktar voru á síðasta kjörtímabili.
Víðtæk löggjöf ESB hefur lengi verið gagnrýnd bæði af fyrirtækjum og hagfræðingum sem telja að reglugerðarbyrðin geri sambandið minna samkeppnishæft á heimsvísu. Því er oft líkt saman við að íþróttamenn séu látnir bera lóð á fótum, þegar þeir keppa í íþróttum til dæmis langhlaupi.