Eftir deilurnar um Grænland eru Bandaríkin í fyrsta skipti nefnd sem neikvæður þáttur í öryggismynd Danmerkur. Þetta kemur fram í nýju hættumati frá dönsku leyniþjónustunni Forsvarets Efterretningstjeneste, FE, sem varar við afleiðingum ef Bandaríkin gegna ekki lengur hlutverki verndara Evrópu.
Nýja matið, sem margir danskir fjölmiðlar hafa vakið athygli á, lýsir því hvernig aðgerðir Bandaríkjanna geta einnig haft áhrif á eigin bandamenn.
DR greinir frá því að danska leyniþjónustan skrifi í skýrslunni að Bandaríkin nýti sér „efnahagslegan og tæknilegan styrk sinn sem valdatæki, einnig gagnvart bandamönnum og samstarfsaðilum.“
Leyniþjónustan bendir samtímis á að „óvissa ríki um hlutverk Bandaríkjanna sem tryggingu fyrir öryggi Evrópu“ og telur að það gæti haft áhrif á vilja Rússa til að auka blendingsárásir á Nató.
Þetta breytta mat kemur eftir að forsætisráðherra Danmerkur lýsti því yfir í upphafi ársins að Bandaríkin væru enn nánasti bandamaður landsins, þrátt fyrir yfirlýsta ósk Donalds Trumps Bandaríkjaforseta um að „fá“ Grænland.
Krefst endurvopnunar Evrópu
Matið er kynnt í ársskýrslu FE „Horfur“ (sjá pdf að neðan) sem oft setur fókus á Rússland, Kína og ógn af hryðjuverkum. Rússland og stríðið í Úkraínu eru í kastljósi skýrslunnar í ár.
FE vísar í fyrra hættumat frá þessu ári, þar sem komist var að þeirri niðurstöðu að ef stríðinu í Úkraínu yrði hætt eða það fryst – og Nató myndi ekki samtímis hervæðast – þá gæti Rússland verið tilbúið fyrir stórstríð í Evrópu innan um fimm ára.
Þá komst leyniþjónustan að þeirri niðurstöðu að engin hætta væri á hernaðarárás á Danmörk. Þetta gildir enn í nýja matinu. Jafnframt segir FE að rússnesk hernaðarógnun við Nató muni aukast.
Niðurstaða skýrslunnar er sú að Evrópuríki verði bæði að hervæðast og vinna nánar saman til að efla fælingarmátt gegn Rússlandi – í ljósi þeirrar óvissu sem nú ríkir um hlutverk Bandaríkjanna sem öryggistryggingu fyrir Evrópu.