Leiðtogar ESB bregðast með þjósti við viðurlögum Bandaríkjanna gegn fimm evrópskum einstaklingum sem tengjast umfangsmikilli ritskoðun á Internet. Ursula von der Leyen, Kaja Kallas og Emmanuel Macron vara við „ógn gegn tjáningarfrelsinu“ – en þau sjálf hafa verið og eru leiðandi í að setja reglur sem takmarka tjáningarfrelsið.
Viðurlög Bandaríkjanna gegn fimm evrópskum valdamönnum hafa framkallað geðveikiskast á hæsta stigi innan ESB. Og viðbrögðin eru kaldhæðnisleg. Það eru einmitt þessir leiðtogar sem hafa í mörg ár rúllað í gegn lögum, áróðri og yfirþjóðlegu kerfi til að takmarka tjáningarfrelsi almennings í Evrópu. Og svo þykjast þau allt í einu vera hissa núna, þegar Bandaríkin stöðvar ritskoðunina.
Framkvæmdastjórn ESB var fyrsta stofnunin sem fékk reiðikast og sendi frá sér yfirlýsingu (sjá pdf að neðan). Á eftir komu einstakir leiðtogar ESB sem æsa sig yfir málfrelsiskröfum Bandaríkjamanna.
Von der Leyen talar um frelsi – en þaggar niður í andófsmönnum
Forseti framkvæmdastjórnar ESB, Ursula von der Leyen, birti fljótt sína eigin útgáfu af veruleikanum. Hún tók sig til og skrifaði á X (þeim samfélagsmiðli sem ESB hefur reynt að þagga niður í):
„Tjáningarfrelsi er undirstaða hins sterka og líflega evrópska lýðræðis. Við erum stolt af því. Við munum vernda það.“
Á sama tíma er það undir hennar leiðsögn sem ESB hefur komið með löggjöf um stafræna ritskoðun. Framkvæmdastjórnin hefur fengið rétt til að klekkja á samfélagsmiðlum, krefjast þess að færslur verði fjarlægðar, hóta fyrirtækjum milljörðum í sektir og skilgreina hvaða skoðanir teljast „ásættanlegar.“ Þúsundir Evrópubúa hafa þegar verið rannsakaðir og hlotið refsingu eða verið þaggaðar niður vegna stefnu sem von der Leyen segist vera að verja. Að segjast vera stoltur yfir tjáningarfrelsi ESB er því ekkert annað en ömurlegt og öfugsnúið pólitískt leikhús fáránleikans.
Kallas hljóðar upp um fullveldið og valtar yfir aðildarríkin
Kaja Kallas, utanríkismálastjóri ESB, er jafnvel í enn meiri geðshræringu. Hún segir ákvörðun Bandaríkjanna „óásættanlega“ og „áskorun gegn fullveldi okkar.“ Hún lýsir ESB sem fórnarlambi bandarískrar stjórnmála á meðan hún sjálf er aðalpaurinn í því ESB-verkefni sem hefur margítrekað valtað yfir ákvarðanir, lög og réttarkerfi aðildarríkjanna í nafni „evrópskra gilda.“
Yfirlýsing framkvæmdastjórnarinnar:
Macron ver Breton – heilann á bak við ritskoðunarmaskínu Evrópusambandsins
Emmanuel Macron, forseti Frakklands, var fljótur að fordæma ferðabannið og sagði það „ógnvekjandi.“ Að baki reiði hans býr hollusta við Thierry Breton; Frakkann sem persónugerir nýja ritskoðunarveldi ESB. Það var Breton sem hamaðist við að koma stafrænu þjónustulöggjöfinni, Digital Service Act DSA, í gegn. Það var Breton sem hótaði opinberlega Elon Musk fyrir að fylgja ekki DSA. Hann reyndi sérstaklega að fá Musk til að falla frá að taka viðtal við Donald Trump fyrir forsetakosningarnar 2024, sem líklega hafði áhrif á útkomu kosninganna.
Það var Breton sem notaði valdið til að fjarlægja pólitískt viðkvæmt efni, líka það sem er fullkomlega löglegt. Að honum er núna meinað að nota Bandaríkin sem vettvang fyrir ritskoðun er bein afleiðing af því ritskoðunarkerfi sem hann hefur sjálfur byggt upp.
Viðbrögðin afhjúpa leiðtoga ESB
Þegar Bandaríkin tjá sig núna er ekki um neina sýndarmennsku að ræða. Þetta er í fyrsta skipti sem einhver setur alvarleg takmörk á tilraunir ESB-elítunnar til að hafa áhrif á það sem fólki í öðrum löndum er heimilt að segja. Leiðtogar ESB tala um „gildi, lýðræði og frelsi“ samtímis og stefna þeirra leiðir til þess að reikningum fólks á samfélagsmiðlum er lokað, færslum eytt, fjölmiðlar eyðilagðir og fólk ofsótt og kært fyrir að segja skoðanir sínar.
Þegar leiðtogar ESB reiðast og eru í uppnámi yfir boðskap Bandaríkjanna, þá afhjúpa þeir sig sem hræsnara frammi fyrir öllum heiminum. Og kaldhæðnislegt og þversagnakennt er það vægast sagt, þegar þau nota sjálf X, – vettvanginn sem þau reyna að kála, vegna þess að þar gildir ritfrelsi.