Bandaríkin vara við því í nýju stefnuskjali að öfgasamtök, glæpasamtök og ríkistengdir hópar hafa „nýtt sér veik landamæri Evrópu og skerta fjármuni til hryðjuverkavarna“ og breytt álfunni í „gróðrarstíu hryðjuverka.“
Stjórn Donald Trump forseta hefur birt nýja stefnu sína gegn hryðjuverkum (sjá pdf að neðan) og þó þar sé Evrópa skilgreind sem „mikilvægasti og langvarandi“ samstarfsaðili Bandaríkjanna í baráttunni gegn hryðjuverkum er einnig bent á að svæðið hafi opnað sig fyrir innrás hryðjuverkamanna, sem skapi bæði óstöðugleika og ógn fyrir Evrópu sjálfa og hættu á útflutningi öfgahyggju til annarra svæða.
Gróðrarstía hryðjuverkaógnar
Athyglisvert er að skjalið gefur sterklega í skyn að þau Evrópuríki sem teljast spilltust eða skaðlegust í baráttunni gegn hryðjuverkum geti átt von á minni aðstoð frá Bandaríkjunum í aðgerðum gegn hryðjuverkum eftir því sem tíminn líður, þar sem Bandaríkin vilji ekki stuðla að því að „grafa undan þeim grundvallargildum sem skilgreina sameiginlega siðmenningu okkar.“
Skjalið, sem var skrifað af fyrrverandi öryggisritstjóra Breitbart News, dr. Sebastian Gorka, segir í stefnu Bandaríkjanna gegn hryðjuverkum 2026:
„Heimurinn er öruggari þegar Evrópa er sterk, en Evrópa stendur frammi fyrir mikilli ógn og er bæði skotmark hryðjuverka og gróðrarstíu hryðjuverkaógnar.“
Mannaráðningarmiðstöðvar fyrir hryðjuverkamenn
Með vísan til hryðjuverkasamtaka á borð við al-Qaeda og Íslamska ríkið, sem og glæpagengja og jafnvel „blandaðra ógna“ frá óvinaríkjum, segir stefnuskjalið að Evrópa hafi leyft sér að verða gegnsýrð af slíkum öflum og þannig gert ógnina stærri. Í skjalinu segir:
„… hópar hafa óhindrað nýtt sér veik landamæri Evrópu og skerta fjármuni til hryðjuverkavarna til að breyta Evrópu í „gefins” athafnasvæði fyrir skipulagningu árása gegn Evrópubúum og Bandaríkjamönnum.
Það er óásættanlegt að auðug NATO-ríki geti þjónað sem fjárhagslegar, skipulagslegar og mannaráðningarmiðstöðvar fyrir hryðjuverkamenn.
Evrópa hefur enn tækifæri til að breyta eigin og sameiginlegum örlögum sínum í baráttunni gegn hryðjuverkum ef hún viðurkennir hina raunverulegu ógn og grípur til aðgerða nú þegar … Öllum er ljóst að vel skipulagðir fjandsamlegir hópar nýta sér opin landamæri og tengdar alþjóðahyggjuhugmyndir.
Því meira sem þessir framandi menningarheimar vaxa og því lengur sem núverandi stefna Evrópu heldur áfram, þeim mun öruggari verður útbreiðsla hryðjuverka. Evrópa, vagga vestrænnar menningar og gilda, verður að grípa til aðgerða núna og stöðva meðvitaða hnignun sína.“
Ógnin kemur innan frá
Í umfjöllun um orsakir þessarar þróunar segir skjalið jafnframt að „óheftur fjöldainnflutningur fólks hafi orðið færiband fyrir hryðjuverkamenn“ og hvatti Evrópu til að styðjast við tjáningarfrelsi sem vörn gegn öfgahyggju með því að leyfa „heiðarlegar umræður um íslamisma.“ Evrópuríki þurfi að verja „nægilegum“ fjármunum til hryðjuverkavarna og taka „meiri ábyrgð á eigin öryggi.“
Bandaríkin munu vinna áfram með „alvöru“ samstarfsaðilum í Evrópu í baráttunni gegn hryðjuverkum, segir stefnuskjalið, en mun útiloka þá sem séu að „grafa undan þeim grundvallargildum sem skilgreina sameiginlega siðmenningu okkar.“
Hvíta húsið sér fyrir sér „America First“-stefnu gegn hryðjuverkum sem muni skapa öryggi um allan heim með því að sýna árangursrík dæmi um landamæraöryggi og greiningu ógna sem bandalagsríki gætu fylgt. Trump-stjórnin lítur ekki á „America First“ sem þjóðrembu heldur sem heilbrigða skynsemi og heiðarleika sem getur leiðbeint og veitt hinum siðmenntaða heimi innblástur. Því þjóð sem ekki er heiðarleg í því að setja öryggi eigin borgara í fyrsta sætið er ekki treystandi — og þjóð sem vanrækir eigið öryggi verður ekki bjargað.
Þessi nálgun er framhald af hinni umtöluðu ræðu varaforsetans JD Vance á öryggisráðstefnunni í München í febrúar 2025, sem var eitt af fyrstu stóru opinberu verkefnum hans í embætti og fyrsta heimsókn hans til Evrópu, þar sem hann sagði pólitískri forystu álfunnar að Evrópuríkin væru að yfirgefa sameiginleg gildi sín.
Á meðan Evrópa örvænti vegna ytri ógna þá er stærsta ógnin við álfuna „ógnin innan frá“ sagði Vance og hvatti bandamenn Bandaríkjanna til að taka frelsið aftur í sátt.