Sá góði maður sem með snarræði og í stjórnmálaátökum varði stjórnarskrá íslenska lýðveldisins, þegar hart var sótt að Íslendingum og þeir áttu að borga fyrir skuldir óreiðumanna, þáverandi forseti Íslands, Ólafur Ragnar Grímsson, er aftur kominn til varnar stjórnarskránni gegn ásælni ESB að komast yfir landið.
Fyrrverandi forseti Íslands, Ólafur Ragnar Grímsson, hefur síðustu vikur stigið fram sem einn af skýrari gagnrýnendum fyrirhugaðrar þjóðaratkvæðagreiðslu um áframhaldandi aðildarviðræður Íslands við Evrópusambandið.
Í ítarlegu viðtali í hlaðvarpinu Chess After Dark (sjá YouTube að neðan) og síðar í viðtölum og færslum á samfélagsmiðlum hefur Ólafur Ragnar varað við því sem hann kallar „hugmyndafræðilega“ umræðu um ESB og hvatt til efnislegrar umræðu um áhrif aðildar á fullveldi Íslands, efnahag og lýðræði.
Sagði ESB-umræðuna minna á trúarjátningu
Í viðtalinu gagnrýndi Ólafur Ragnar sérstaklega það sem hann kallaði slagorðapólitík í umræðunni um Evrópusambandið.
„Sumir talsmenn aðildar tala um ESB með svipuðum hætti og kommúnistar töluðu áður um Sovétríkin“ sagði hann og bætti við að hættulegt væri þegar pólitísk umræða færi að líkjast trúarjátningu þar sem allar niðurstöður væru gefnar fyrirfram.
Hann hafnaði jafnframt fullyrðingum um að upptaka evru myndi sjálfkrafa leiða til lægri vaxta og betri lífskjara og vísaði til þess að:
- ekkert nágrannaríki Íslands væri í ESB
- aðeins Finnland af Norðurlöndunum hefði tekið upp evru
- og að Ísland, Noregur og Svíþjóð hefðu staðið sterk utan evrusvæðisins
Segir ESB glíma við „tilvistarkreppu“
Ólafur Ragnar vísaði einnig í svo kallaða Draghi-skýrslu um stöðu Evrópusambandsins og sagði hana sýna að Evrópa stæði frammi fyrir alvarlegri samkeppniskreppu gagnvart Bandaríkjunum og Asíu.
Hann sagði Evrópu glíma við:
- aukið regluverk
- hægari hagvöxt
- pólitíska spennu
- og versnandi samkeppnishæfni
Í nýlegri færslu á samfélagsmiðlum vitnaði hann jafnframt í orð þýska kanslarans um að Evrópa hefði orðið „heimsmeistari í ofregluvæðingu“.
Í reynd formleg umsókn um inngöngu í Evrópusambandið
Ólafur Ragnar hefur einnig gagnrýnt hvernig ríkisstjórnin lýsir fyrirhugaðri þjóðaratkvæðagreiðslu. Að hans mati sé villandi að tala um „viðræður“ eða „að kanna hvað sé í boði“ þar sem ákvörðun um að hefja aðildarviðræður sé í reynd formleg umsókn um inngöngu í Evrópusambandið.
„Þau voru alveg hreinskilin með það að verið væri að sækja um aðild að Evrópusambandinu“ sagði hann um ríkisstjórn Jóhönnu Sigurðardóttur árið 2009.
Harðar deilur um sjávarútvegsmál
Ummæli Ólafs Ragnars um ESB hafa einnig vakið deilur á samfélagsmiðlum. Fyrrverandi forsetinn gagnrýndi nýlega ummæli sjávarútvegsstjóra ESB um mögulegar undanþágur fyrir Ísland frá sameiginlegri sjávarútvegsstefnu sambandsins og spurði hvort Ísland ætti að semja um „nýja stefnu sem enginn skilur.“
Ummælin leiddu til harðra viðbragða frá meðal annars hagfræðingnum Gauta B. Eggertssyni og fjölmiðlamanninum Agli Helgasyni, sem gagnrýndu að fyrrverandi forseti tæki svo virkan þátt í pólitískri umræðu um ESB.
Telur málið eitt það stærsta í sögu lýðveldisins
Í viðtalinu sagði Ólafur Ragnar að hugsanleg aðild Íslands að Evrópusambandinu væri „stærsta ákvörðun sem lýðveldið hefur staðið frammi fyrir í áratugi“. Hann sagði mikilvægt að þjóðin fengi ítarlega og raunsæja umræðu áður en gengið yrði til atkvæðagreiðslu.