Bandaríkjaforseti Donald Trump hefur tilkynnt að tollar á bíla og vörubíla frá Evrópusambandinu verði hækkaðir úr 15% í 25%. Ákvörðunin er talin geta haft alvarleg áhrif á evrópskan bílaiðnað — sérstaklega á Þýskaland sem reiðir sig mjög á útflutning lúxusbíla til Bandaríkjanna.
Trump segir Evrópusambandið ekki hafa staðið við fyrri viðskiptasamning milli aðila og heldur því fram að nýju tollarnir muni neyða evrópska framleiðendur til að flytja meiri framleiðslu til Bandaríkjanna.
Þýskir bílaframleiðendur eins og BMV, Mercedes-Benz, Volkswagen, Porsche og Audi eru taldir standa verst að vígi vegna þess að stór hluti framleiðslu þeirra fyrir Bandaríkjamarkað fer fram í Evrópu. Sérstaklega eru Audi og Porsche viðkvæm þar sem fyrirtækin hafa takmarkaða eigin framleiðslu í Bandaríkjunum.
Samkvæmt Kiel-stofnuninni fyrir heimshagfræði gæti þýska hagkerfið tapað allt að 15 milljörðum evra vegna tollanna til skemmri tíma og jafnvel allt að 30 milljörðum evra til lengri tíma litið.
Fréttirnar höfðu þegar áhrif á markaði þar sem hlutabréf þýskra bílaframleiðenda lækkuðu og evrópski bílageirinn varð einn sá versti á hlutabréfamörkuðum Evrópu dagana eftir tilkynninguna.
Í Evrópu hafa viðbrögðin verið hörð. Þýski Evrópuþingmaðurinn Bernd Lange sagði tollana beinast sérstaklega gegn Þýskalandi og fullyrti að hvorki lagalegar né efnahagslegar ástæður lægju að baki ákvörðuninni.
Evrópusambandið hefur varað við mögulegum gagnráðstöfunum ef Bandaríkin ganga endanlega frá hækkun tollanna. Meðal annars hefur verið rætt um gagntolla og útflutningstakmarkanir gegn bandarískum vörum.
Á sama tíma telja sumir sérfræðingar að Trump noti tollahótanir fyrst og fremst sem samningatæki til að þrýsta á Evrópu í stærri viðskiptadeilu. Forstjóri BMW, Oliver Zipse, sagðist enn gera ráð fyrir að tollarnir yrðu síðar lækkaðir á ný eftir frekari samningaviðræður.