Uppfærð frétt* Í Georgíu dreymir fólk um sjálfstæði. Þar valdi 300 manna kjörráð knattspyrnumanninn Mikheil Kavelashvili sem forseta til að tryggja fullveldi þjóðar sinnar sem er undir daglegum árásum frá ESB mfl. Útsendarar margra ríkja ferðast gagngert til Tblisi til að mótmæla Georgíska draumnum sem síðan er sjónvarpað til Vesturlanda og sagt vera mómæli innlendra. Á Íslandi var Halla Tómasdóttir kjörin forseti. Hún elskar grænu „umskiptin“ og vill sjá risastóran koltvísýringsmæli utan á Hörpu svo „allir Íslendingar geti fylgst með kolefnisspori landsins.“ Í Georgíu mótmæla íbúarnir „Endurræsingunni miklu“ og hafna glóbalizmanum. Á Íslandi hafnar fólk vinstri stefnu en fær heimsendaspjátrung á Bessastaði með endurræsta vinstristjórn sem keyrir yfir sjálfstæði og fullveldi Íslands með afturgöngu ESB-umsóknar.
Í lýðræðislegum kosningum í Georgíu í október vann ríkisstjórnaflokkurinn Georgíski draumurinn yfirburðasigur og áframhaldandi umboð þjóðarinnar. Þar sem flokkurinn vill ekki að ESB gleypi þjóðina með húð og hári er hann nagli í augu valdhafanna í Brussel. Georgíski draumurinn frysti aðildarviðræður Evrópusambandssinna og er refsað fyrir það. Kjörráðið felldi fyrrverandi forseta landsins, Salome Zourabichvili, sem er málpípa ESB. ESB og aðrir glóbaliztar hafa ráðist á þjóðina og neitað að samþykkja niðurstöðu þingkosninganna í október og reyna að skapa óstöðugleika innanlands fyrir mögulega valdaránstilraun gegn lýðræðislega réttkjörnum embættismönnum Georgíu.
Til að skilja betur, hvers vegna Mikheil Kavelashvili var valinn sem forseti, má benda á að Mikheil hefur að sögn Reuters ásakað vesturveldin um að reyna að draga Georgíu í stríð gegn Rússlandi. Mikheil var einn af höfundum lagatillögu um að þau samtök og stofnanir sem fjármögnuðu sig umfram 20% með erlendu fjármagni yrðu skilgreind sem „erlendir umboðsmenn.“ Kom það mjög við kaun Soros og Opnu samfélagssamtaka hans. Mikheil Kavelashvili hefur því unnið sigur sem lögmætur fulltrúi hennar í stað sjálfstæðissvikarans Salome Zourabichvili.
*Leiðrétting: Upprunalega var sagt að þjóðin hafi kosið forsetann sem ekki er rétt, því forsetinn er ekki kjörinn í beinni kosningu af kjósendum heldur kjörinn af sérstöku 300 manna kjörráði. Stjórnarskrá Georgíu var breytt 2017 þegar Georgíu varð þingræðislegt lýðveldi. Þá voru völd forsetans takmörkuð og kjörráðið stofnað með meðlimum þingsins, fulltrúum svæða og sveitarfélaga. Sjá Wikipedia hér. Þessi leiðrétting breytir ekki innihaldi greinarinnar um valdaránstilraunir ESB og Georgíska drauminn sem hlaut 54% fylgi þjóðarinnar í kosningunum sjá hér.
Valkyrjur eru skökk útkoma fyrir Ísland
Á Íslandi sæta ESB-sinnar lagi sem þeim hefur boðist núna bæði með glóbalízkan forseta og ríkisstjórn. Eftir vinstri höfnun Íslendinga með útrýmingu þingflokka Pírata og VG eiga landsmenn eftir að fá í alvöru að finna fyrir því, hversu skökk útkoman er með hinni nýju ríkisstjórn sem mun ekkert gefa hinni einu sönnu vinstristjórn Jóhönnu Sigurðardóttur og Steingríms Sigfússonar eftir. Höllu Tómasdóttur er ætlað hlutverk sambandsstýru yfir íslenska amtinu í ESB. Valkyrjustjórnin mun nota alla kraftana til að troða landsmönnum inn í Evrópusambandið. Icesave er horfið, búið að breyta löggjöfinni sem tryggði Íslandi sigur og ESB sem mætti í fullri múnderingu til að hlæja að óförum Íslands tapaði. Stefna Davíðs Oddssonar um að þjóðin ætti ekki að borga óreiðuskuldir fjárglæframanna stóðst áhlaupið og reynsluna.
Sagan eftir þann sigur yfir svikamyllu Samfylkingar og Viðreisnar er saga um hrörnun sjálfstæðishreyfingarinnar á Íslandi. Eftir Davíð Oddsson og Geir Haarde hefur Sjálfstæðisflokkurinn ekki haft neina alvöru leiðtoga sem um má kenna þá stöðu sem þjóðin er komin í núna. Í stað þess að búa við tryggt sjálfstæði Íslands sem fullvalda þjóð sem sjálf ræður örlögum sínum verður þjóðin enn á ný að sitja undir árás og atlögu Samfylkingarinnar og Viðreisnar sem í þetta sinn hafa hleypt Flokki fólksins tímabundið undir ESB-vænginn. Þjóðin er rétt að byrja að skynja þá svikasúpu sem búið er að draga hana í.
Sjálfstæðismenn á Íslandi ættu að líta á Georgíska drauminn til að fá smá tilfinningu fyrir því, hvers vegna georgíska þjóðin fylkir sér um þann flokk og nýjan forseta sinn gegn alræðisógninni frá Brussel. Ef þeir hefðu staðið sig eftir Davíð Oddsson og Geir Haarde, þá væri íslenska þjóðin ekki í þessari stöðu í dag.
#BREAKING: The Parliament of Georgia has elected Mikheil Kavelashvili as the President, a politician widely known for his strong opposition to the Western bloc. pic.twitter.com/yo5slvu3z3
— Munir Afrah (@Muniirafrah) December 15, 2024
