Alþjóða sósíalisminn og afdankaðir gamlir krataforingjar eins og Stefan Löfven fv. forsætisráðherra Svíþjóðar eru að fara á taugum vegna þess málfrelsis sem Elon Musk berst fyrir. Undir engum kringumstæðum á að leyfa venjulegum dauðlegum borgurum að hafa aðra skoðun en þá sem Ursula von Der Leyen og hirðin í Brussel hefur sagt að sé sú „rétta.“ Jafnaðarmaðurinn Löfven vill stoppa „falsupplýsingarnar“ sem hann fullyrðir að dreift sé á X. Hann er núna formaður Sósíalistaflokks Evrópu sem Samfylkingin á aðild að.
Hér að neðan má sjá hvernig sósíalistar í Evrópu eru skipulagðir í PES eða flokki Sósíalista í Evrópu „The Party of European Socialists.“ Eins og sjá má á myndinni er Samfylkingin tengd flokknum sem stuðningsmeðlimur og nafn Kristrúnar Frostadóttur er nefnt. Þeir eiga eftir að breyta síðunni og segja að flokkurinn sé í ríkisstjórn en gamlar upplýsingar um að Samfylkingin sé í stjórnarandstöðu eru á síðunni. Þarna skipuleggja sósíalistarnir sig til að berjast gegn málfrelsi og verja með klóm og kjafti sína menn í öllum löndum Evrópu burtséð frá því hvaða misgjörningar þeir gera.
Musk er alls staðar
Þegar Elon Musk ræddi við formann Valkosts fyrir Þýskaland á X í gær voru yfir 150 ESB búrókratar og algoriþmasérfræðingar sem mældu, hvort X gerði Valkost fyrir Þýskaland sýnilegra en Brussel hirðin leyfir. Á að negla Musk niður fyrir að brjóta ritskoðunarreglur ESB og hirða af honum 6% af heildartekjum X í heiminum. Verður fróðlegt að fylgjast með niðurstöðum ESB sérfræðinganna um hversu marga millimetra Musk fór út fyrir ESB mörkin.
Það fer í fínustu taugar sósíalista ESB að Musk skuli dirfast að gagnrýna hetjur þeirra eins og Keir Starmer sem heldur hlífiskildi yfir pakistönskum barnaníðingshringjum í Bretlandi. Stefan Löfven fyrrum forsætisráðherra Svíþjóðar segir í viðtali við Dagens Nyheter:
„Musk heldur að hann sé guð núna. Hann móðgar kanslara og forseta Þýskalands. Hann ræðst á forsætisráðherra Englands. Hann telur að reka beri ítalska dómara sem ganga gegn skoðunum hans. Hann er alls staðar.“
Musk notar fasískar aðferðir
Löfven heldur áfram:
„Við verðum að muna að Evrópa gekk í gegnum mjög erfiða tíma fyrir allmörgum árum. ESB er byggt til að forðast að það gerist aftur. Það var alger áróður og rangar upplýsingar sem lögðu grundvöllinn. Fasismi byggist meðal annars á upplýsingaherferðum, að þrýsta skoðunum áfram. Þetta er svipað og það.“
