Nawrocki og Trump til vinstri, þýski þingmaðurinn Moritz Körner til hægri.
Þýski þingmaðurinn Moritz Körner frá frjálslynda flokknum FDP hótar Póllandi með nýjum viðskiptaþvingunum af hálfu ESB eftir að Pólverjar völdu íhaldsmanninn Karol Nawrocki sem forseta Póllands.
Karol Nawrocki sem nýtur stuðnings íhaldsflokksins PiS, Laga og réttlætis, vann á sunnudag með 50,9% atkvæða gegn frambjóðanda Donalds Tusk, Rafal Trzaskowski. Nawrocki er fyrrverandi hnefaleikamaður og stuðningsmaður Donald Trump Bandaríkjaforseta. Junge Freiheit segir að kjör pólskra kjósenda falli ekki í kramið í Brussel. Þýski þingmaðurinn Moritz Körner skrifar á X:
„Ef nýkjörinn forseti sniðgengur nauðsynlegar umbætur á réttarríkinu með neitunarvaldi sínu, þá verður ESB að frysta fjármagnið aftur.“
Að hans sögn er „þolinmæðin að renna út“ og „traustið“ sem Pólland öðlaðist eftir þingkosningarnar 2023 er „horfið“ eftir útkomu forsetakosninganna.
Í mars 2024, nokkrum mánuðum eftir að frjálslyndi flokkur Donalds Tusks tók við stjórnartaumunum, þá ákvað framkvæmdastjórn Evrópusambandsins að aflétta frystingu á 137 milljörðum evra til Póllands. „Réttarríkið ESB“ borgaði ekki peningana vegna andmæla gegn fyrri ríkisstjórn íhaldsflokksins Laga og réttlætis. Framkvæmdastjórnin vísaði til þess að ríkisstjórn Tusks hefði lagt fram „metnaðarfulla aðgerðaáætlun“ til að endurreisa „meginreglur réttarríkisins.“
Á valdatíma Laga og réttlætis var pólska dómskerfið endurbætt. Meðal annars voru nýir dómarar skipaðir og agaviðurlög tekin upp til að takast á við pólitíska dómara en ESB neyddi Pólland síðar til að afnema lögin. Enn er réttarstaða margra dómara umdeild. Lög og réttlæti tilheyrir ECR-hópnum á ESB-þinginu sem gagnrýnir ESB og vill fullvalda þjóðir en Tusk forsætisráðherra Póllands vinnur náið með CDU, SPD, Græningjum og FDP.