Málfundafélagið Frelsi og fullveldi heldur úti hlaðvarpi með þeim góðu mönnum séra Geir Waage (t.v á mynd) og séra Halldóri Gunnarssyni (t.h). Þeir ræða ýmis brýn hagsmunamál þjóðarinnar og í þessu rúmlega 8 mínútna myndskeiði úr hlaðvarpinu þann 23. júní ræða þeir sérstaklega um ESB-kosningu ríkisstjórnarinnar 29. ágúst n.k. (sjá YouTube að neðan).
Halldór Gunnarsson: Við sitjum hér að spjalli, séra Geir Waage og ég, Halldór Gunnarsson, í 23. júní. Mig langar að eiga stutt spjall við þig með hnitmiðaðri spurningu. Séra Geir, danska þingið ætlaði að gera Ísland að amt í Danmörku árið 1851. Hvað er íslenska ríkisstjórnin að gera í dag sem er sambærilegt því sem danska stjórnin lagði til árið 1851? Viltu útskýra það?
Séra Geir Waage:
„Þeir eru að leggja til að við verðum einhvers konar amt eða hreppur í Evrópusambandinu. Og þetta kemur frá íslenskum stjórnvöldum.
Heggur sá er hlífa skyldi. Það er íslenska ríkisstjórnin sem með þessari tillögu sinni er sennilega að brjóta bæði hegningarlög og tvímælalaust stjórnarskrána, sem bannar allt framsal ríkisvalds til útlendinga. Hún bannar alla afhendingu ríkisvalds á Íslandi til annarra en lögbærra stjórnvalda á Íslandi.
Gleymum því ekki að fullveldisréttur þjóðarinnar liggur hjá þjóðinni, ólíkt því sem er til dæmis í Bretlandi. Þar er fullveldið hjá breska þinginu. Á Íslandi er fullveldið hjá þjóðinni. Það má vel færa rök að því að með þessari tillögu, sem við eigum að kjósa um 29. ágúst, sé íslenska ríkisstjórnin að gera tilræði við fullveldi og frelsi landsins. Það má einnig færa rök fyrir því að þetta séu hreinlega drottinsvik sem hér eru í gangi, því samkvæmt stjórnarskránni ber stjórnvöldum að vernda frelsi og fullveldi þjóðarinnar og gæta hagsmuna Íslendinga.
Jón Sigurðsson mótmælti tillögu danska þingsins. Við vorum með okkar eigin uppkast að stjórnarskrá. Þegar Trampe neitaði að leyfa umræður um hana og sleit þjóðfundinum, þá mótmælti Jón Sigurðsson í nafni konungs og þjóðarinnar því ofríki sem þinginu var sýnt. Þá stóð allur þingheimurinn upp, líka konungskjörnu þingmennirnir, og sögðu: „Við mótmælum allir.“ Nú er það ríkisstjórnin sjálf sem stendur að tilræði við frelsi og fullveldi Íslendinga. Og það virðast vera fáir til varnar. Að minnsta kosti er enginn Jón Sigurðsson í þingsal. Svo mikið er víst.“
Halldór Gunnarsson: Vandamálið er að það á að halda áfram með þá framvindu að þetta sé bara að „kíkja í pakkann“.
Séra Geir Waage:
„Já, það er ekkert um það að ræða að „kíkja í pakkann“. Það er blekking. Það er blekking að segja að við viljum aðeins áframhaldandi viðræður eða að við viljum ræða við Evrópusambandið um inngöngu. Slík stefnumörkun er í sjálfu sér stefnumörkun um inngöngu. Evrópusambandið sveigir ekki löggjöf sína að okkar þörfum eða vilja. Við verðum að ganga í það verkefni að aðlaga íslensk lög og íslenskan rétt að reglum Evrópusambandsins. Um það snýst málið.
Ég trúi því ekki fyrr en ég tek á því að þjóðin sé svo vitlaus, gjörsamlega laus við allt vit, að hún segi já við þessum tillögum ríkisstjórnarinnar.
Eitt af því sem ég vildi bæta við er að ég skil ekki hvernig kratarnir geta átt aðild að þessu. Þá tala ég ekki um Flokk fólksins, sem fyrir kosningar lýsti því eindregið yfir að hann væri frelsis- og fullveldisflokkur. Kratarnir lýstu því líka eindregið yfir. Forsætisráðherrann, Kristrún Frostadóttir, sagði að hún vildi ekki efna til óvinafagnaðar eða kljúfa þjóðina í tvær andstæðar fylkingar. Það hefur þeim þó tekist undir hennar forystu. Hún sagði jafnframt að ef þessi spurning kæmi upp, þá kæmi hún upp síðast á kjörtímabilinu.“
Halldór Gunnarsson: Já, en við erum ekki að tala um þá stöðu núna. Við erum að tala um það sem er nýjast að gerast. Séra Geir, það eru búin að vera stofnuð samtök ungs fólks og miðaldra fólks með afar breiða skírskotun. Þau hafa auglýst í ríkissjónvarpi og ríkisútvarpi og halda utan um þann málflutning að þetta sé svo eðlilegt að gera. Þeir sem þar töluðu sögðu: „Við munum mynda samtök um að segja já, þannig að við vitum nákvæmlega um hvað við eigum að kjósa þegar samningurinn verður borinn upp.“
Séra Geir Waage:
„Þá verður ekkert um annað kosið en að segja já eða nei við samningnum. Ef við segjum nei, þá erum við þegar orðin aðilar að miklu leyti. Við höfum þegar farið nánast alla leið. Þannig að það formsatriði að bera upp einhvern samning til samþykktar eða synjunar verður gagnslaust.
Hvernig fór með Maastricht-samninginn þegar hann var borinn undir þjóðaratkvæði á Írlandi? Írar sögðu nei. Þeir voru látnir kjósa aftur, og þá sögðu þeir já.“
Halldór Gunnarsson: Já, vegna þess að þeir horfðust í augu við orðinn hlut.
Séra Geir Waage:
„Já, eins og við munum horfast í augu við ef við segjum já 29. ágúst. Þetta eru aðlögunarviðræður. Það verður klárað að ganga frá þeim samningum sem þegar er byrjað að undirrita. Gjörningurinn verður gerður.
En hugsaðu þér eftirmælin þegar púðurreykurinn hefur lagst af þessum vígvelli, þegar aftur verður heiðskýrt og menn sjá handa sinna skil og fá kannski vitið aftur gagnvart orðnum hlut, ef allt fer á versta veg. Hugsaðu þér þá eftirmælin sem þeir eiga eftir að bera til allrar framtíðar sem hafa staðið að þessu tilræði við Íslendinga.“
Halldór Gunnarsson: En við horfumst í augu við það í dag hvað er búið að gerast og hvaða réttindi er búið að taka af þjóðinni nú þegar.
Séra Geir Waage:
„Já. Við gætum farið yfir það hvaða missi við höfum orðið að horfast í augu við.“
Halldór Gunnarsson: Já, ég veit.
Séra Geir Waage:
„Hugsaðu þér líka nytsemina og sakleysið hjá þeim sem hafa tekið þátt í þessari aðferð. Hugsaðu þér bæði kratana og Flokk fólksins, sem eiga beina aðild að þessu tilræði við þjóðina. Látum nú Viðreisn liggja á milli hluta. Þeir hafa aldrei leynt því hverjir þeir eru. Þeir eru alþjóðahyggjufólk af allra hættulegustu gerð.“
Halldór Gunnarsson: En hvað getum við gert til þess að reyna að ná því fram að fólk…
Séra Geir Waage:
„Það er efni í annan þátt, Halldór minn. Það er efni í annan þátt. Við skulum láta þetta duga í bili.“