Hátíðahöldin hófust með ræðu forsetans við Rushmore fjallið þar sem höfuð forsetanna George Washington, Thomas Jefferson, Theodore Roosvelt og Abraham Lincoln eru greypt í fjallið. Eftir hátíðarræðu Trumps var mikil flugeldasýning.
Mount Rushmore, Suður-Dakóta – Donald Trump, Bandaríkjaforseti, flutti hátíðarræðu við Mount Rushmore að kvöldi 3. júlí, í aðdraganda 250 ára afmælis sjálfstæðisyfirlýsingar Bandaríkjanna. Ræðan var ein af stærstu hátíðarræðum forsetans til þessa og einkenndist af sterkri föðurlandsást, lofi um sögu og stjórnskipan Bandaríkjanna og harðri gagnrýni á kommúnismann.
Trump lýsti 4. júlí 1776 sem einni mikilvægustu dagsetningu mannkynssögunnar og sagði að engin þjóð hefði á jafn skömmum tíma náð jafn miklum árangri og Bandaríkin.
„Bandaríkin eru elsta lýðveldi jarðar, frjálsasta þjóð heims og farsælasta ríki sem mannkynið hefur skapað,“ sagði forsetinn og bætti við að ekkert ríki hefði gert meira gagn fyrir heiminn.
Ræðan fór fram við Mount Rushmore, þar sem andlit fjögurra forseta eru höggvin í granítfjallið. Trump heiðraði sérstaklega George Washington, Thomas Jefferson, Abraham Lincoln og Theodore Roosevelt og sagði þá hafa lagt grunninn að frelsi, sjálfstæði og stórveldisstöðu Bandaríkjanna. Að sögn forsetans minna þessir leiðtogar þjóðina á hver hún sé og hvaða gildi hafi gert Bandaríkin að einstöku ríki.
Menning þjóðarinnar mikilvægari en pappír
Trump lagði mikla áherslu á að stjórnarskrá ein og sér tryggi ekki frelsi.
„Stjórnarskrá er aðeins jafn sterk og fólkið og menningin sem verja hana,“ sagði hann.
Hann hélt því fram að á undanförnum árum hefði verið reynt að rjúfa tengsl Bandaríkjamanna við eigin sögu, veikja þjóðarvitundina og gera ómögulegt að svara spurningunni um hvað það þýði að vera Bandaríkjamaður. Forsetinn sagði að bandarísk menning, saga og sameiginleg sjálfsmynd væru undirstaða frelsisins og að þær yrðu að varðveitast fyrir komandi kynslóðir.
Kommúnisminn stærsta ógnin
Stærstur hluti ræðunnar snerist um gagnrýni á kommúnisma. Trump sagði hugmyndafræðina hafa valdið dauða um 100 milljóna manna á síðustu öld og lýsti henni sem andstæðu frelsis, trúar og lýðræðis.
Hann hélt því fram að kommúnismi væri aftur á uppleið í Bandaríkjunum og að hann bærist meðal annars með fólki sem kæmi nýflutt til landsins og aðhylltist hugmyndir sem væru andstæðar bandarískum gildum.
Forsetinn sagði jafnframt að ekki væri hægt að vera bæði trúr kenningum Karl Marx og jafnframt sannur bandarískur föðurlandsvinur.
„Þú getur verið kommúnisti eða bandarískur föðurlandssinni. Þú getur ekki verið hvort tveggja,“ sagði hann.
Hrósaði afrekum Bandaríkjanna
Trump taldi upp fjölda afreka sem hann sagði sýna yfirburði Bandaríkjanna á síðustu 250 árum.
Hann nefndi meðal annars uppbyggingu járnbrauta, rafvæðingu, ljósaperuna, símann, flugvélina, tölvuna, internetið, GPS, snjallsímann, geimferðir, kortlagningu erfðamengisins og fjölda annarra uppfinninga sem hefðu orðið til í Bandaríkjunum.
Einnig sagði hann Bandaríkjamenn hafa unnið flest Nóbelsverðlaun, flest Ólympíuverðlaun, skráð flest einkaleyfi og byggt öflugasta hagkerfi heims.
Forsetinn sagði að eftir forsetakosningarnar hefði fjárfmagn streymt til Bandaríkjanna á áður óþekktum hraða og að nýjar verksmiðjur væru reistar og iðnaðaruppbygging ættu sér núna stað um allt land.
Hann sagði að fyrir aðeins tveimur árum hefðu önnur ríki hlegið að Bandaríkjunum en nú bæru leiðtogar heims aukna virðingu fyrir landinu.
Upphaf gullaldar
Í lok ræðunnar sagði Trump að 250 ára afmælið markaði ekki endalok ákveðins tímabils heldur upphaf nýrrar gullaldar.
„Þetta er aðeins upphaf gullaldar Bandaríkjanna,“ sagði forsetinn.
Hann lauk ræðunni með því að óska Bandaríkjamönnum gleðilegs sjálfstæðisdags og hét því að gera Bandaríkin „stærri, betri og sterkari en nokkru sinni fyrr.“