Bílasali á Stokkhólmssvæðinu hefur verið ákærður fyrir brot gegn alþjóðlegum refsiaðgerðum eftir að fyrirtæki hans keypti þrjá bíla í eigu rússneska sendiráðsins í Svíþjóð.
Refsiaðgerðirnar banna viðskipti við rússneska ríkið án sérstaks leyfis, en bílafyrirtækið hafði ekkert slíkt leyfi. Karolina Lindekrantz, saksóknari hjá sérdeild sænska ákæruvaldsins gegn alþjóðlegri og skipulagðri glæpastarfsemi, útskýrir lagaákvæðin í viðtali við sænska ríkisútvarpið.
– Hafi maður ekki sótt um slíkt leyfi hefur maður ekki heimild til að eiga viðskipti við eða taka við neinu frá Rússneska sambandsríkinu, segir hún.
Í einstæðu dómsmáli hefur fyrirsvarsmaður bílafyrirtækis nú verið ákærður fyrir brot gegn alþjóðlegum refsiaðgerðum. Fyrirtækið greiddi 415.000 sænskar krónur fyrir bílana þrjá, tvær Toyota Avensis-bifreiðar og eina Ford Mondeo-bifreið.
Greiðslan fór ekki beint til rússneska sendiráðsins heldur til fyrirtækis sem ákæruvaldið grunar að hafi verið notað sem leppur. Það millifærði síðan peningana á reikninga erlendis.
Að sögn saksóknarans var þetta tilraun til að leyna bílakaupunum og sniðganga efnahagslegar refsiaðgerðir sem gripið hefur verið til gegn Rússlandi vegna stríðsins í Úkraínu.
Samkvæmt lögum er hægt að sækja um undanþágu frá refsiaðgerðunum í sérstökum tilvikum, en bílafyrirtækið gerði það ekki.
– Í Svíþjóð hafa lengi verið í gildi lög sem kveða á um að það geti verið refsivert að virða ekki þær refsiaðgerðir sem eru í gildi, segir Lindekrantz við sænska ríkisútvarpið.
Ákærði bílasalinn neitar sök og segir kaupin hafa verið mistök. Hann hafi ekki vitað að bílarnir væru í eigu sendiráðsins.