Dr. Anthony Fauci, fyrrverandi forstjóri NIAID neitaði strax í upphafi að bera vitni og bar fyrir sig 5. viðauka stjórnarskrár Bandaríkjanna. Yfirheyrslan, sem bar yfirskriftina „Vitnisburður Anthony Fauci“, hófst klukkan 8:30 þann 29. júlí í fundarsal SD-342 í Dirksen-skrifstofubyggingu öldungadeildarinnar, samkvæmt opinberri tilkynningu nefndarinnar.
Í yfirheyrslunni, eftir að Rand Paul hafði lokið spurningum sínum, tók lögmaður Faucis að skipta sér af fundinum. Paul sagði að lögmaðurinn hefði ekki leyfi til að taka til máls og yrði að þegja. Lögmaðurinn sinnti því ekki og lét Paul þá öryggisverði vísa honum út úr fundarsalnum. Þá braust út dynjandi lófatak viðstaddra.
Rand Paul sagði meðal annars:
– Þú hefur ekki leyfi til að taka til máls! Ef þú heldur áfram að trufla fundinn verður þér vísað út. Þú hefur ekki leyfi til að tala. Öryggisverðir! Þér var sagt að sitja ekki við borðið. Þú krafðist þess engu að síður og þér var jafnframt sagt að þú fengir ekki að taka til máls. Þér hefur ekki verið boðið hingað til að bera vitni.
Paul sagði einnig að lögmaðurinn væri að trufla fundinn og spurði hvort hann myndi haga sér með sama hætti í réttarsal.
– Nei, vegna þess að þá myndi dómarinn láta setja þig í fangelsi. Ég get ekki gert það í dag, en ég get látið fylgja þér út úr húsinu. Sestu því hljóður og segðu ekki eitt orð í viðbót.
Þegar lögmaðurinn hélt áfram sagði Paul: Hann hefur ekki leyfi til að taka til máls fyrir nefndinni eða formanninum. Ef hann segir eitt orð enn verður honum vísað út úr salnum. Þessi yfirheyrsla er vitnisburður Anthony Fauci. Þetta er ekki leikur lögmanna hans. Þeir mega ráðleggja honum og ræða við hann, en þeir hafa ekki leyfi til að tala hér.
Paul benti jafnframt á að lögmanninum hefði verið sagt að sitja í sætaröðinni fyrir aftan vitnaborðið en ekki við borðið sjálft. Að lokum fyrirskipaði hann öryggisvörðum:
– Þú hefur ekki leyfi til að taka til máls. Öryggisverðir, vinsamlegast fylgið honum út úr salnum.
Paul bætti síðan við að látið yrði skrá í fundargerð að Fauci hefði enn til ráðstöfunar ráðgjöf hinna lögmannanna sem hann hefði komið með á fundinn.