Það mætti halda að Ísland sé alheimsbækistöð netþrjóta í heiminum eftir lestur New York Times í gær sem „upplýsir“ alheim um glæpafyrirtækið „Witheld for Privacy“ sem deilir heimilisfangi með 320 getnaðarlimum spendýra á Reðasafninunu á Kalkofnsvegi 2 í Reykjavík.
Í ljós kemur við lesturinn að um er að ræða innlegg til að þrýsta á Íslendinga og íslensk stjórnvöld til að innleiða ritskoðun og afnema persónuvernd á Íslandi. Þar sem alþjóðasinnarnir eru að missa tökin í málefnabaráttunni og fólk hefur í dag aðgengi að valkostamiðlum til dæmis eins og Þjóðólfi á netinu, þá er í gangi herferð um allan hinn vestræna heim til að koma á fullkomnu stafrænu eftirliti með sérhverjum einstaklingi og fullkominni ritskoðun. Þetta er svívirðileg ófrægingarherferð gegn Íslandi og Íslendingum og árás á málfrelsið, friðhelgi einkalífsins og mannréttindi. Skömm að „Persónuvernd“ vilji innleiða slíkan fasisma á Íslandi.
„Sumar af vafasömustu síðum vefsins eru hýstar á Íslandi. Í byggingu í Reykjavík sem hýsir getnaðarlimasafn og H&M eru einnig fjölmargir auðkennisþjófar, lausnarhugbúnaður og falsfréttastarfsemi til húsa.“
Þannig hefst grein gærdagsins eftir blaðamenn New York Times, þau Steen Lee Myers og Tiffany Hsu. Birtar eru myndir frá Reykjavík og þessari falsupplýsingamiðstöð alheims sem hýsir auðkennisþjófa og vafasamar síður á Internet á Kalkofnsvegi 2. Greinin er umfangsmikil enda var Steen Lee Myers sérstaklega á Íslandi til að rannsaka þessa alheimsmiðstöð „glæpaverka á Internet.“
Tengja Reðasafnið alþjóðlegri glæpastarfsemi á netinu
Steen gerir að sérstöku umtalsefni að Reðasafn sé í húsakynnunum sem „sýni 320 sýnishorn af spendýratyppum.“ Svo skrifar hann:
„Fyrir þá sem spora skemmdarverk á netinu hefur byggingin hins vegar það orð á sér að vera sýndarheimili margra af verstu gerendum heims á sviði persónuþjófnaðar, lausnarhugbúnaðar, falsupplýsinga, svika og annarra misgjörða. Á Kalkofnsvegi 2 er einnig skráð heimilisfang fyrirtækisins „Withheld for Privacy“ sem er hluti af vaxtarbylgju að mestu leyti stjórnlausum iðnaði á Íslandi og víðar sem gerir fólki sem sér um netlén að dylja hverjir eru á ferð. Þótt aðferðin sé algeng fyrir vefsíðueigendur sem reyna að vernda sig gegn áreitni eða ruslpósti, þá hefur hún einnig hjálpað öðrum að fela spor sín frá samviskusömum eftirlitsaðilum, lögreglu eða fórnarlömbum.“
Greinarhöfundar fullyrða:
„Fyrirtækið „Withheld for Privacy“ og aðrar svo kallaðar umboðsþjónustuveitur hafa gert Ísland að alþjóðlegri miðstöð fyrir ólöglega starfsemi í algjöru ósamræmi við stærð landsins.“
Rákust á typpasafnið í ritskoðun á auglýsingum stuðningsmanna Donald Trump
Rakin er saga fyrirtækisins sem sagt er að sé stofnað árið 2021 af Namecheap, einum af stærstu vefsíðuveitendum heims. Greint er frá örðugleikum við að ná sambandi við stjórnendur fyrirtækisins. Síðan og kannski ekki svo óvænt segja greinarhöfundar eftirfarandi:
„Vísindamenn við Syracuse háskólann sem rannsaka villandi pólitískar auglýsingar á Facebook og Instagram rákust á typpasafnið þegar þeir reyndu að hafa uppi á eigendum vefsíðu sem eyddi 1,3 milljónum dala í svikaauglýsingar fyrir stuðningsmenn Donald J. Trump fyrrverandi forseta.“
Eigandi Facebook, Meta, lokaði fyrir auglýsingarnar og lokaði léninu á bak við þær á þessu ári í ritskoðun á efni stuðningsmanna Trumps og öðru efni sem ekki passar að pólitískum rétttrúnaði Meta.
„Bandaríski hvíti ofurmannhópurinn Ættjarðarfylkingin notar Kalkofnsveg 2 fyrir alþjóða glæpastörf á netinu“
Greinarhöfundar skrifa:
„Vegna þess að Withheld for Privacy notar heimilisfang byggingarinnar sem sjálfgefna fyrir viðskiptavini sína, hefur Kalkofnsvegur 2 verið tengdur við spjallborð á netinu sem hvíti ofurmannahópurinn í Bandaríkjunum, Ættjarðarfylkingin „Patriot Front“ notar til að selja fölsk hormónalyf til transkvenna; veiðisíður sem gefa sig út fyrir að vera fyrirtæki eins og Amazon, Coinbase og Spotify til að stela peningum og persónulegum upplýsingum frá gestum; og til rússneskra áhrifaherferða sem ætlað er að dreifa fölskum frásögnum til grunlausra Bandaríkjamanna.“
„Ísland er aðlaðandi staður fyrir umboðsþjónustu að mestu leyti vegna öflugra persónuverndarlaga, sem embættismenn sögðu að væru til að vernda venjulega notendur gegn einræðisstjórnum en ekki til að vernda skjólstæðinga eða aðra glæpamenn.“
Greinarhöfundar segja að hvorki „Withheld for Privacy“ né „Namecheap“ hafi svarað ítrekuðum beiðnum um athugasemdir. Vitnað er í Valborgu Steingrímsdóttur, eftirlitsstjóra Persónuverndar, sem segir að þjónusta fyrirtækisins sé „eingöngu til að fela hver raunverulegur ábyrgðaraðili er.“ Þá lýsir Greg Aaron, forstjóri ráðgjafafyrirtækisins Illumintel, yfir áhyggjum af vaxandi glæpum á netinu.
Greinarhöfundar upplýsa:
„Persónuvernd hefur, ásamt saksóknara og fjarskiptaráðuneyti landsins, beitt sér fyrir lagasetningu sem myndi í raun banna þjónustu eins og Withhold for Privacy frá starfsemi á Íslandi. Steingrímsdóttir segir að það þurfi að breyta lögum svo hægt sé að ná tökum á þessu vandamáli.“
Greinarhöfundar vitna til fjölmargra aðila íslenskra sem erlendra sem lýsa erfiðleikum við að ná tali af forsvarsmönnum þessa glæpafyrirtækis við hlið Reðasafnsins. Haft er eftir framkvæmdastjóra ISNIC, Jens Petur Jensen, að samkvæmt lögum gæti ISNIC sem er einkafyrirtæki með skráningu léna á Íslandi, lokað fyrir fimm lén, en „Ísland hefur enga lagaheimild yfir vefsvæðum sem nota önnur lén, jafnvel þótt þau séu skráð á heimilisföng í landinu.“
Verið að misnota veikleika Íslands
Greinarhöfundar ræða síðan fjálglega um afbrotastarfsemi á netinu sem stunduð er frá Íslandi. Sagt er meðal annars frá DarkSide, nethakkahóp með aðsetur í Rússlandi sem gerði árás á Bandaríkin, Herra Dougan með falsfréttasíður fyrir Rússland, falsaðar sjónvarpssíður meðal annars ein með falsfréttum um fröken Harris, herferðir kanadískum leikara, svindl gagnvart íbúðarkaupum, sportbílaáhugamönnum og tónlistarmenn og svo framvegis. Síðan skrifa greinarhöfundar:
„Þátttaka Rússa vekur sérstakar áhyggjur á Íslandi, sem er aðili að Nató en hefur hvorki fastaher né leyniþjónustu. Elfa Ýr Gylfadóttir, framkvæmdastjóri fjölmiðlanefndar landsins segir: Verið er að misnota veikleika okkar sem opið lýðræðislegt samfélag.“
Fullyrt er að Withheld for Privacy hafi skráð um 35 milljónir léna í byggingunni í Reykjavík, og greinarhöfundar gefa því möguleika að öll lénin séu ekki í höndum glæpamanna en hins vegar séu persónuverndarlög á Íslandi hindrun í vegi til að ná í rússneska falsfréttadólga og aðra glæpamenn á netinu.
