Thjodolfur

frjals og fullvalda

Thjodolfur

frjals og fullvalda

Nemendur kveikja í skólum í Frakklandi

Gústaf Skúlason

Uppfært með athugasemd:

„Þetta er fyrsta fréttin um óeirðirnar hjá Þjóðólfi og margir miðlar tala um að „nemendur” standi að baki óeirðunum. Fyrirsögnin ber þess merki að Þjóðólfur var ekki búinn að setja sig nægjanlega í málið í fyrstu fréttinni eins og sjá má á seinni fréttum þar sem talað er um hugsanlega borgarastyrjöld.”

Það sem var sagt að byrjaði sem mótmæli vegna fjárskorts í frönskum skólum hefur á skömmum tíma þróast í landskrísu og innflytjendur setja svip sinn á óeirðirnar. Framhaldsskólanemendur hafa lokað aðgengi að skólum, almenningssamgöngur hafa raskast, kveikt hefur verið í nokkrum byggingum og ráðist á bæði lögreglu og björgunarlið. Á myndskeiðum sem dreift er á samfélagsmiðlum má sjá að stór hluti virkustu óeirðaseggjanna hylur andlit sitt og að margir eru af innflytjendaættum.

Ólga hefur ríkt á götum Frakklands undanfarna viku og á fimmtudag magnaðist ástandið enn frekar. Tæplega 2.000 manns voru handteknir þann dag og yfir 300 lögreglumenn eru sagðir hafa slasast í átökunum.

Mótmælin hafa breiðst út frá Parísarsvæðinu til borga um allt Frakkland. Samkvæmt innanríkisráðuneytinu hafa þau haft áhrif á starfsemi um 1.000 framhaldsskóla. Á nokkur hundruð stöðum hafa nemendur reynt að stöðva kennslu með lokunum og íkveikjum. Háskólanemar hafa einnig bæst í hópinn.

Að baki mótmælunum liggur fyrst og fremst óánægja með ástandið í frönskum skólum. Nemendur lýsa fjölmennum bekkjum, skorti á kennurum og öðru starfsfólki og illa förnum skólabyggingum. Myndskeið sem dreift er á samfélagsmiðlum draga þó upp aðra mynd af hluta mótmælanna.

Á myndskeiðum frá ýmsum stöðum í Frakklandi sjást ungmenni fremja umfangsmikil skemmdarverk og kveikja elda. Í nokkrum þeirra sjást einnig ungmenni af innflytjendaættum.

Íkveikjur og ofbeldisfull átök

Mótmælin hafa víða tekið á sig mun ofbeldisfyllri mynd og eldar verið kveiktir bæði innan og utan skólalóða.

Við skóla í Marseille eru tveir kennarar auk þess sagðir hafa fengið bensín yfir sig þegar ástandið fór úr böndunum. Yfirvöld segja að nokkur hundruð manns hafi slasast í mótmælunum.

Ríkisstjórnin boðar til neyðarfundar

Sébastien Lecornu forsætisráðherra kallaði ríkisstjórnina saman til sérstaks neyðarfundar á fimmtudag. Ráðherrar voru hvattir til að aflýsa ferðum og öðrum fyrirætlunum til að takast á við átökin sem færu ört vaxandi.

Skólastjórnendur og kennarar hafa jafnframt víða orðið fyrir hótunum og árásum. Á samfélagsmiðlum er meðal annars dreift myndskeiði sem sagt er sýna skólastjóra verða fyrir flugeldi sem beint var að líkama hans.

Kona sem reyndi að fá mótmælendur til að hætta skemmdarverkum varð fyrir hrottafenginni árás fyrir augum mannfjöldans. Kveikt var í andliti hennar og hári.

Pólitískar deilur um hverjir standi að baki

Mótmælin hafa fljótt orðið hluti af pólitískum átökum í Frakklandi. Ríkisstjórnin og stjórnmálamenn á hægri vængnum hafa sakað vinstriflokkinn La France Insoumise, LFI, um að stuðla að þátttöku ungmennanna í mótmælunum.

Fulltrúar flokksins hafa sést á nokkrum mótmælafundum og ásakanirnar hafa vakið víðtækari umræðu um hlutverk stjórnarandstöðunnar í mótmælunum.

Hægristjórnmálakonan Marine Le Pen hefur gengið svo langt að halda því fram að ekki sé lengur aðeins um mótmæli skólanemenda að ræða, heldur óeirðir sem pólitísk öfl skipuleggi.

LFI hafnar þeirri lýsingu og leggur áherslu á að flokkurinn styðji friðsamleg mótmæli. Flokksleiðtoginn Jean-Luc Mélenchon hefur jafnframt gagnrýnt aðgerðir lögreglunnar harðlega og sagt að ekki megi nota ofbeldisverk sem átyllu til að hunsa kröfur nemenda.

Enn er óljóst hversu lengi mótmælin munu standa eða hversu umfangsmikil þau verða. Þau hófust með áherslu á daglegt skólastarf en hafa nú þróast í víðtækari átök milli nemenda, lögreglu og ríkisstjórnar.

Áhugaverðar fréttir