Sveðjubrjálæðingurinn í menntaskólanum í Fagersta lofaði fjöldamorðingjana Anders Behring og Anton Lundin Pettersson á TikTok reikningi sínum sem núna hefur verið lokað.
Hinn 18 ára Liam Carlos Nebel, sem grunaður er um sverðsárásina í Brinellskólanum í Fagersta, er sagður hafa greint frá því í yfirheyrslu hjá lögreglu að fórnarlömbin hafi verið valin af handahófi og að hann hefði viljað drepa fleiri. 17 ára stúlka lést og þrír drengir særðust í árásinni.
Samkvæmt upplýsingum Aftonbladet sagði hinn 18 ára gamli maður við yfirheyrslu að hann hefði ráðist á „fyrsta mann sem varð á vegi hans“ inni í skólanum.
Þegar hann var spurður hvers vegna hann hefði gert árásina einmitt á föstudeginum er hann sagður hafa svarað að hann „hefði verið tilbúinn“. Hann er einnig sagður hafa sagt að hann „hefði helst viljað drepa fleiri“.
Hinn grunaði var nemandi við Brinellskólann og gat því komist inn um útidyr skólans með rafrænu aðgangskorti.
Fréttamiðillinn Riks hefur nafngreint hinn 18 ára gamla mann sem Liam Carlos Nebel. Samkvæmt miðlinum hafði hann áður verið dæmdur fyrir líkamsárás á nemanda í Risbroskólanum í Fagersta.
Í þeirri árás er Nebel sagður hafa tekið nemandann hálstaki og slegið hann í höfuð og efri hluta líkamans. Hann var fyrst dæmdur til úrræðis á vegum barnaverndaryfirvalda. Áfrýjunardómstóll bætti síðar við 25 klukkustunda samfélagsþjónustu fyrir ungmenni.
Riks greinir einnig frá því að TikTok-reikningur sem tengdur er Nebel hafi innihaldið lofsamlegar færslur um Anders Behring Breivik og skólamorðingjann Anton Lundin Pettersson. Skömmu fyrir árásina á föstudag var þar birt mynd af sverði ofan á gítartösku með textanum „No more edits“. Reikningnum hefur síðan verið eytt.
Nebel er í haldi lögreglu, grunaður um morð og þrjár tilraunir til morðs. Saksóknari hefur enn ekki viljað tjá sig um hugsanlega ástæðu árásarinnar.