Thjodolfur

frjals og fullvalda

Thjodolfur

frjals og fullvalda

Læknar vara við eftir ringulreiðina í Ceuta: „14 ára stúlkum er nauðgað“

Gústaf Skúlason

Að minnsta kosti fimm stúlkur undir lögaldri hafa fengið meðferð vegna gruns um nauðganir í kjölfar hinnar miklu bylgju farandfólks til spænsku útlendunnar Ceuta. Á sama tíma segja læknar frá heilbrigðiskerfi undir gríðarlegu álagi og stúlkum undir 14 ára aldri sem neyðast til að sofa á götunni.

Ceuta glímir enn við afleiðingar hinnar sögulegu bylgju farandfólks frá Marokkó. Að minnsta kosti fimm stúlkur, engin þeirra eldri en 14 ára, hafa á síðustu viku fengið meðferð á háskólasjúkrahúsinu í Ceuta vegna gruns um kynferðisofbeldi, samkvæmt heimildum úr heilbrigðiskerfinu sem Euronews hefur rætt við.

Drengur er einnig sagður hafa orðið fyrir kynferðisofbeldi. Sjúkrahúsið hefur auk þess meðhöndlað meira en tólf tilfelli sem talin eru samræmast kynferðisofbeldi.

Spænska ríkislögreglan rannsakar eitt málanna þar sem stúlka undir lögaldri var flutt á sjúkrahús með áverka sem samræmdust kynferðisofbeldi. Ekki hefur verið greint frá neinum handtökum og enn er óljóst nákvæmlega við hvaða aðstæður meint brot áttu sér stað. Hins vegar er sagt að komið hafi verið í veg fyrir nokkrar tilraunir til kynferðisofbeldis eftir að heimamenn gripu inn í.

Stúlkur sofa á götunni

Susana Ascaso, bráðalæknir á sjúkrahúsinu í Ceuta, segir að nokkrar stúlknanna séu yngri en 14 ára og að þær hafist við á götunni vegna þess að móttökukerfið fyrir börn undir lögaldri hafi ekki nægilega mörg pláss.

Læknirinn lýsir ástandinu sem heilbrigðishamförum. Að sögn hennar tekur sjúkrahúsið á móti um 300–400 farandmönnum á dag, á sama tíma og fjöldi starfsfólks og önnur úrræði eru að mestu þau sömu og fyrir hina miklu bylgju farandfólks í lok júlí.

Hún varar einnig við því að heilbrigðiskerfið hafi ekki nægilega getu til að greina til dæmis berkla og lifrarbólgu, né heldur til að meðhöndla fólk með langvinna sjúkdóma sem hefur orðið án sinna hefðbundnu lyfja.

Hjálparsamtök hafa einnig varað við ástandinu. Bent er á hættu á mansali og kynferðislegri misnotkun stúlkna undir lögaldri sem eru utan hins hefðbundna barnaverndarkerfis.

Tugþúsundir komust inn í Ceuta

Bakgrunnurinn er hin dramatíska þróun 30. júlí þegar tugþúsundir manna komust frá Marokkó inn í Ceuta, spænsku útlenduna á strönd Norður-Afríku.

Spænsk yfirvöld hafa áætlað að um 72.000 manns hafi komist yfir landamærin í þessari miklu bylgju. Margir reyndu að komast yfir landleiðina en aðrir syntu eða fóru sjóleiðina. Meira en 80 manns hafa látist í tengslum við tilraunir til að komast til Ceuta.

Eftir fyrsta áfallið styrkti Spánn landamærin með herliði og öryggissveitum. Stór hluti þeirra sem komust inn hefur síðan snúið aftur til Marokkó, en hundruð barna undir lögaldri hafa orðið eftir í Ceuta. Yfir 1.300 börn undir lögaldri hafa verið skráð og móttökustöðvar, sem í raun eru aðeins ætlaðar fyrir um 90 börn, geta engan vegin tekið við öllum börnunum.

Samkvæmt upplýsingum frá AP og öðrum fjölmiðlum gegndu samfélagsmiðlar mikilvægu hlutverki. Orðrómur dreifðist um að landamærin hefðu verið opnuð eða að Spánn myndi leyfa fólki að dvelja í landinu. Færslur á meðal annars TikTok, Instagram og Facebook eru sagðar hafa dreift upplýsingum um mögulegar leiðir yfir landamærin og um breytingar á spænskri innflytjendastefnu.

Spænsk yfirvöld hafa jafnframt bent á efnahagslega örvæntingu og mikið atvinnuleysi meðal ungs fólks í Marokkó sem mikilvægar undirliggjandi ástæður.

Áhugaverðar fréttir