Kontext ehf gerði samanburð á lífskjörum á Íslandi og innan ESB fyrir Áfram Ísland eins og sjá má á pdf hér að neðan. Í greinargerð með skýrslunni segir:
„ Í fyrsta lagi sýna langflestir efnahagslegir mælikvarðar að Ísland bæði stendur ESB framar og að þróun síðustu ára hefur almennt verið hagfelldari. Gildir einu hvort horft sé til atvinnuleysis, hagvaxtar, framleiðni eða opinberra fjármála, svo einhver dæmi séu tekin. Gengi krónunnar er álíka stöðugt eða stöðugra en helstu gjaldmiðla í samanburði við Bandaríkjadal. Þegar kemur að fjármagnskostnaði stendur Ísland hins vegar höllum fæti og er vaxtabyrði heimila sú mesta enda vextir mjög háir.
Í öðru lagi er kaupmáttur með því mesta sem gerist og hefur hann vaxið hraðar á Íslandi en í flestum Evrópuríkjum á undangengnum árum. Séu ráðstöfunartekjur bornar saman við verðlag má segja að verðlag hér sé fremur lágt eða jafnvel lægst í öllum vöruflokkum þar sem tekjur hér eru almennt hærri en gengur og gerist í álfunni.
Í þriðja lagi er sem fyrr segir ljóst að háir vextir og mikil verðbólga eru veikleik ar í íslensku efnahagslífi. Meiri hagvöxtur, meiri framleiðsluspenna og háar verðbólguvæntingar virðast þar hafa mikið að segja. Enn fremur sker Ísland sig úr í launahækkunum í alþjóðlegum samanburði en óþekkt er að verðlag sé stöðugt í ríkjum þar sem launahækkanir á framleidda einingu er svipaðar og á Íslandi.
Í fjórða lagi sýna mismunandi mælikvarðar fram á mestan jöfnuð á Íslandi og að fátækt sé lítil. Virkni ungs fólks er í sérflokki og þá búa mun fleiri í eigin húsnæði en almennt í ESB.
Í fimmta og síðasta lagi er samkeppnishæfni almennt meiri á Íslandi en í ríkjum ESB og hefur hún þokast upp á við síðustu ár, á meðan hún hefur almennt dalað í ríkjum ESB. Þá stendur Ísland sérstaklega vel lýðfræðilega enda þjóðin ung og fæðingartíðni hærri en gengur og gerist, þó hún hafi farið lækkandi. Horfur eru því á að Ísland verði mun betur í stakk búið en önnur Evrópuríki til að takast á við öldrun næstu áratugi.
Samandregið er því hægt að álykta að lífskjör og staða efnahagsmála standi mun sterkari fótum á Íslandi en almennt gerist í ESB. Taka skal fram að opinberar hagtölur eru iðulega endurskoðaðar og samanburður milli landa og yfir tíma getur stundum verið vandkvæðum háður. Einmitt vegna þessa er gagnlegt að horfa til fjölbreyttra mælikvarða líkt og gert er í skýrslunni. Skýrslan skiptist í eftirfarandi kafla þar sem farið er nánar í þessi atriði og fleiri:
