FJÖLDASTURLUN

„Mesta ógn við mannkyn er ekki hungursneyð, jarðskjálftar eða örverur…..heldur geðrænir faraldrar….hrikalegri en verstu náttúruhamfarir.“ Verstur slíkra faraldra væri „fjöldasturlun, brjálæðisfaraldur þegar stór hluti samfélagsins verður raunveruleikafirrtur“ og trúir fáránlegum staðhæfingum eins og þeim að hægt sé að skipta um kyn. – Carl Jung.

Í nýju viðtali við Íris Erlingsdóttir sem býr í Bandaríkjunum er það rökkurland sem heimurinn er staddur í til umræðu. Íris byrjar á því að segja frá högum sínum í Bandaríkjunum sem hefur verið hennar heimastaður í meira en 30 ár. Á Íslandi byrjaði hún fjölmiðlastörf sem ritstjóri Gestgjafans rétt rúmlega tvítug. Hún vann við fréttamennsku og upplestur frétta bæði hjá sjónvarpinu og Stöð 2 og þekkir því bransann innan frá. Það gerir frásögn hennar enn trúverðugri, þegar hún gerir grein fyrir þeim athugunum sínum á nútíma fréttamennsku að sama sagan er sögð orðrétt af mörgum mismunandi fréttaveitum út um allan heim samtímis.

Fyrirsát?

Íris skrifaði greinina „Trump: ljótur kall – Zelensky: góður kall“ um frægan fund í þeirra í Hvíta húsinu fyrir helgi. Ræddu þau Gústaf Skúlason um fundinn og Íris upplýsti um þá ótrúlegu staðreynd að orðið fyrirsát var á toppnum út um allan heim samtímis á fréttamiðlum eftir fundinn. Á myndinni að neðan má sjá á bláu línuriti hvernig notkun á orðinu fyrirsát (ambush) slær í þakið á sama tíma í mörgum vestrænum ríkjum og í heiminum. Engu er líkar en að fjölmiðlar heims séu sami lúðurinn og ein veita stjórni þeim öllum.

Af því má ráða að lítið er um sjálfstæða blaðamennsku hjá helstu fjölmiðlum heims heldur virðast flestir fá eina frétt sem er afrituð og birt hugsunarlaust. Íris segir:

„Allir stóru fjölmiðlarnir á Vesturlöndum túlka fundinn á sama veg. Og ekki einu sinni á sama veg heldur með sömu orðum.“

Hér er að sjálfsögðu rætt um „fyrirsát“ Bandaríkjaforseta og varaforseta fyrir Zelenský forseta Úkraínu en þeirri skoðun er dreift um allan heiminn af andstæðingum Bandaríkjanna, að Trump og Vance hafi undirbúið fundinn með Zelensky í þeim tilgangi einum að niðurlægja hann fyrir umheiminum í beinni útsendingu frá Hvíta húsinu. Íris skrifaði í grein sinni:

„Sameiginlega sálmabókarútgáfan er á þá leið að Trump og Vance eiga að hafa skipulagt að veita Zelensky „fyrirsát.“ Þið vitið, Trump og Vance „sátu fyrir“ honum í 40 mínútur og reiddu hann til reiði svo þeir gætu eyðilagt samning sem þeir höfðu unnið að í margar vikur. Líklegt, er það ekki?“

Stækkun Nató til austurs

Þetta eru sömu alþjóðlegu öfl og vilja ráðast á Rússland, hrekja Pútín frá völdum og skipta upp Rússlandi í fimm eða fleiri minni ríki. Þetta eru sömu öflin og sviku loforðið um víkkun Nató til austurs, þegar Berlínarmúrinn var rifinn og austrið sameinaðist vestrinu eftir seinni heimsstyrjöld. Nató hefur stækkað úr 12 stofnaðilum árið 1949 upp í 32 aðila ár 2025. Öll þessi stækkun hefur verið til austurs, öll gömlu Varsjárbandalagsríkin ásamt Eystrarsaltsríkjunum eru Nató meðlimir.

Bandalag þeirra „viljugu“ – Heimskuvæðing ESB

Leiðtogar ESB-ríkjanna orga, Starmer safnaði saman helstu elítu sósíalíska Internationalen í London sem núna kallar sig „bandalag þeirra viljugu“ til áframhaldandi stríðs í Úkraínu.

ESB mun tilkynna vopnavæðingu ESB á fimmtudaginn og kæmi ekki á óvart að rætt yrði um sameiginlegan ESB her. Friðarbandalagið breytist í stríðsbandalag. Verið er að samræða og breyta efnahagskerfi ESB yfir í hreinan stríðsefnahag sem þýðir að framleiðslan fer yfir í vopn sem nota á til að sigrast á Rússlandi.

Fyrrverandi forsætisráðherra Svíþjóðar Carl Bildt segir Trump stjórnina í Washington vera sams konar og einræðisstjórn Norður-Kóreu. Hann lýsir Trump sem nýjum andstæðingi „frelsiselskandi ESB,“ Trump hafi í raun alltaf verið Rússadindill. Allt það höfum við heyrt áður. Að ræða um frið er glæpur og köllin eru samhljóma yfir heila heimsálfu: Fyrirsát, fyrirsát!