Ulf Kristersson forsætisráðherra Svíþjóðar skilur ekkert í því að Svíum fer fækkandi sem nenna að hlusta á snöktið í honum, þegar glæpamenn drepa og særa saklausa meðborgara landsins.
Aðfaranótt laugardags kom 13 ára drengur á aðalgötu Gävleborgar og skaut á fólk fyrir utan skemmtistað. Kraftaverk að enginn dó á staðnum en farið var með sex særða, blæðandi á sjúkrahús og fjórir dvelja þar enn. Þar sem drengurinn er bara 13 ára gamall, þá verður honum ekki refsað, heldur fá barnaverndaryfirvöld umsjón með honum. Hann mun því koma fljótlega aftur og taka upp fyrri iðju. Lögreglan segir skotárásina tengjast uppgjöri glæpagengja nema hvað fólkið sem hinn ungi dólgur skaut voru ekki réttu skotmörkin, heldur venjulegt fólk að skemmta sér eða fólk á vitlausum stað og tíma.
Daginn eftir var íþróttaviðburður í sömu götu og þá var eins og ekkert hefði gerst kvöldið áður skammt frá þegar sex einstaklingar voru skotnir fyrir utan skemmtistað. Samkvæmt veitingahúseiganda á staðnum eru Svíar orðnir kaldir fyrir öllum drápunum, skotárásum og sprengingum og yppa bara öxlum:
„Ef ég lendi ekki í þessu, þá þarf ég ekkert að vera að skipta mér af þessu. Þetta er hið nýja Svíþjóð, fólk er drepið nær daglega, þetta er nýi veruleikinn sem við verðum því miður að búa við.“
Þessi ummæli lýsa hinum kalda raunveruleika, Svíar verða sjálfir að bjarga sér frá kúlnahríðum glæpasvínanna, yfirvöld aðhafast lítið sem ekkert að. Það er orðið sorglega fáránlegt að horfa upp á ráðherra ríkisstjórnarinnar mæta á skot- eða sprengjustað, fella þrjú krókódílatár og endurflytja sömu ræðuna fyrir framan fjölmiðla áður en þeir halda áfram sínu vernduðu lífi:
„Ó, þetta er hræðilegt, komið úr böndunum, ofbeldið er orðið óvenjulega hrátt, hugur minn er hjá fjölskyldum fórnarlambanna…bla, bla, bla.“
Svo skilja stjórnmálamennirnir ekkert í því, að enginn tekur lengur neitt mark á þeim. Þeir eru alla vega ekki að stöðva færiband dauðans, þeir eru bara í því að snyrta líkin og taka inn fleiri glæpamenn sem munu bætast við hina svo hægt sé að drepa enn fleiri.
Glæpasérfræðingurinn Diamant Salihu, sagði í sjónvarpinu, að það væri íhugunarefni að þessu væri leyft að viðgangast, þegar:
„lögreglan, bæjaryfirvöld, félagsmálayfirvöld, þekkja vel til glæpamannanna sem eru í erjum á staðnum síðan 2020 og hægt væri að kalla barnaglæpahópa, en láta það viðgangast þannig að þetta fær að halda áfram.“
Viktor Orbán sendi samúðarkveðju Ungverja til Svía að þurfa að búa við þennan vesældóm yfirvalda. Sænska ríkisstjórnin er framarlega í skítkasti á Orbán í nafni ESB fyrir að hugsa sjálfstætt og hafa stjórn á eigin landamærum og hvetja landsmenn til að mynda fjölskyldur og eignast börn. Í staðinn vill sænski forsætisráðherrann opna fyrir fjöldainnflutningi glæpahópa og hömlulaust kynlíf án fjölskyldusambanda.
