Eldur Smári Kristinsson hefur sent frá sér fyrsta hlaðvarp sem hann kallar Eldvarpið (sjá neðar á síðunni). Þar fjallar hann um ákæru á sig fyrir að hafa framið „hatursglæp“ og að hann eigi yfir höfði sér tveggja ára fangelsi fyrir meðal annars að fullyrða það sem kennt var í barnaskólum hér áður fyrr að kynin væru tvö: maður og kona.
Það eina sem Eldur Smári Kristinsson hefur „gerst sekur um“ er að gagnrýna kynsegin áráttu sem leitt hefur til viðhorfsbreytinga yfirvalda sem halda því fram að karlmenn geti fætt börn samanber ummæli hans hér að neðan:
„Alþingi heldur að karlmenn geti fætt börn. Þessi lög eru í bága við bæði barnasáttmála SÞ og í bága við úrskurð Mannréttindadómstóls Evrópu er varðar rétt barns til þess að þekkja líffræðilegan uppruna sinn. Manneskjur sem fæða börn kallast konur. Konur sem fæða börn eru alltaf líffræðilegar mæður barna sinna. Alveg óháð hvað vanstillt Alþingi segir.“
Eldur Smári ræðir einnig um barnaníð og ýmsar ofbeldiskenndir einstakra fullorðinna, sem aðallega birtist hjá sjúkum karlmönnum, sem vilja svala einhverri kynferðislegri fýsn með ókynþroska börnum. Hann nefnir eina tegund sýki að vilja hafa börn á brjósti en ýmsir einstaklingar virðast eiga erfitt með að ræða það og sumir kalla það í staðinn almenn réttindi að karlmenn geti keypt hormóna til að búa til vökva í brjóstum þeirra sem nýfædd börn geta sogið sem „móðurmjólk.“
Uppspunnin ásökun um að Eldur Smári segi allt transfólk barnaníðinga
Þessi afstaða Elds Smára til tveggja kynja sem er í raun og veru ekkert annað en gamall sannleikur kristinna manna hefur farið illilega í ýmsa „mannréttindafrömuði“ sem berjast fyrir réttindum transfólks. Einn þeirra situr í stjórn hinna ríkisstyrktu samtaka, Samtakanna 78, Jóhannes Þór Skúlason. Hann ásakaði Eld Smára fyrir að fullyrða að allt transfólk væru barnaníðingar í þættinum Spursmál. Það væri hatur gegn ákveðnum þjóðfélagshópi sem refsa bæri fyrir. Jóhannes sagði:
„Tilveruréttur transfólks er ekki skoðun, það er staðreynd.“
Eldur Smári hefur hvergi haldið því fram að transfólk sé ekki staðreynd. Þvert á móti. Hann hefur bara þá afstöðu að kynin séu tvö sem gengur í berhögg við rétttrúnaðarfræðinga nútímans sem segja að hver einstaklingur geti ákveðið huglægt hvaða kyn hann eða hún vill vera og síðan fengið læknavísindin með sér að breyta líffræðilegum eiginleikum líkamans. Reyndar hefur þessi hugmyndafræði gegnið svo langt að börn í barnaskólum eru látin líma saman myndir af líkamshlutum beggja kynja eins og dúkkulísu að eigin vild af því maður geti „ráðið því sjálf(ur) hvaða kyn maður vill vera!“ Hvað er eiginlega verið að kenna börnunum okkar í dag? Verið er að rugla með málfar frá örófi alda sem passar ekki lengur við þessa kynsegin áráttu.
Karlmaður ekki það sama og karlkyn?
Jóhannes Þór ásakaði Eld Smára um að flytja inn hægri skoðanir eins og gilda hjá þeim hræðilega manni Donald Trump en gleymir að minnast á lög Alþingis sem voru nú aftur flutt inn…..hvaðan? Ætli Samtökin ’78 hafi ekki haft puttann í að flytja inn skoðanir fyrir því að sú löggjöf var samþykkt á Alþingi sem Eldur Smári er að gagnrýna?
Það verður fróðlegt að sjá hvernig dómsstóllinn útskýrir mun á karlkyni og karlmanni sem Jóhannes fullyrðir að séu ólíkir hlutir. Hann stóð fastur á því að markmið Elds Smára væri að útmála transfólk sem barnaníðinga sem er engan veginn það sama og Eldur Smári heldur fram þegar hann ræðir ákveðið sjúkdómsafbrigði barnaníðinga. Að halda því fram að til sé ákveðið afbrigði af fuglaflensu hjá svartönd er ekki það sama og fullyrða að allar svartendur þjáist af nákvæmlega því afbrigði. Er ekki Jóhannes Þór Skúlason að fyrirskipa brot gegn málfrelsi með því að klína því sem „hatursglæp“ upp á Eld Smára að vilja ræða þessi mál?
Mál Elds Smára hefur vakið athygli erlendis eins og sjá má á dæmum hér að neðan.
Þjóðólfur hefur áður skrifað um málið, sjá meira hér og hér
Hérna er Eldvarpið og þar fyrir neðan viðtal GB News við Eld Smára Kristinsson:
