Íris Erlingsdóttir skrifar:
En Heimildin sér Trrrrrrrrump samsæri!
Heimildin birti í gær grein um ákvörðun fjölmiðlafyrirtækisins CBS og móðurfyrirtækis þess Paramount um að hætta framleiðslu spjallþáttar Stephen Colberts, The Late Show. Greinin – „Mögulegar mútur Paramount og áhrif Trumps á CBS“ 🙄er sennilega er þýðing á samsæriskenningagrein úr New York Times, Washington Post eða einhverjum hinna „hefðbundnu“ bandarísku fjölmiðla, sem að mestu flytja áróður frá Demókrötum; einu viðmælendurnir í greininni eru góðir og gegnir vinstrisinnar og ekki má bera annað á borð fyrir Íslendinga.
Grínistinn Bill Maher, sem stjórnar spjallþættinum Real Time á HBO, er góður og gegn vinstrimaður, en jafnvel honum er ljóst hvers vegna CBS ákvað að hætta framleiðslu þáttarins.
„Stephen átti þetta skilið. Hann hlaut að sjá þetta fyrir. Þegar það eina sem þú gerir er að sitja í pólitískum skotgröfum og dreifa áróðri… [það] er engin furða að CBS hafi ákveðið að hætta með þáttinn. Margir Bandaríkjamenn urðu þreyttir á uppátækjum Colberts og hvernig hann breytir hverju einasta augnabliki og hverjum einasta hlut í Trump-rugl eða pólitískan umræðupunkt um Trump. Pólitískur húmor þarf hann að vera vingjarnlegur. Þegar þú byrjar að verða kvikindislegur og troða þínum persónulegu skoðunum upp á áhorfendur… í beinni útsendingu… fólk sér í gegnum það. Og fólk bæði á vinstri og hægri vængnum er bara orðið algjörlega þreytt á þessu…
Skynsamur maður myndi… reyna að fara út með einhverri auðmýkt og breyta háttum sínum áður en þátturinn hættir á næsta ári. Jafnvel þótt það sé ekki einlægt, reyndu að minnsta kosti að haga þér eins og eðlilegur spjallþáttastjórnandi… Að sjá Colbert síblaðra um hluti eins og DEI og ólöglega innflytjendur og allt þetta rugl, Ameríkönum verður óglatt af þessu. Í raun móðgar þetta fólk, það vill ekki láta predika yfir sér á sínum eigin heimilum. Þetta er ástæðan fyrir því að fólk er að leita til annarra fjölmiðla til að fá fréttir frá öðrum álitsgjöfum. Hefðbundnir fjölmiðlar eru að deyja út af nákvæmlega þessari ástæðu. Þannig að þetta er allt þér að kenna, Colbert. Þetta er allt þitt verk.“
Heimildin er einn hinna „hefðbundnu fjölmiðla“ sem fólk er hætt að taka mark á, m.a. vegna þess að, eins og Maher sagði, “fólk vill ekki láta predika yfir sér“ af vinstrisinnunum sem stjórna fjölmiðlunum, en einnig vegna þess að sannleikur og raunveruleikinn skiptir þá engu máli. Í takt við þá stefnu minnist greinin hvorki á staðreyndir varðandi það hvað gerist þegar auglýsingatekjur minnka, áhorf lækkar og þáttur, með $60–$100 milljóna framleiðslukostnað, tapar $40 til $50 milljónum á ári. Áhorf minnkaði um 40%––3.3 milljónir áhorfenda––frá 2020 til 2025, niður í 2.4 milljónir árið 2025 (Q2).
Alveg óþarfi að minnast á staðreyndir eins og peninga og kostnað, en í staðinn er vitnað í pólitíkusa Demókrata––sérfræðinga í Trump-samsæriskenningum og spjallþáttagerð––sem og framleiðanda 60 Minutes, Bill Owens, sem hætti í apríl, því hann taldi sig „ekki lengur hafa frelsi til að stýra þættinum og taka sjálfstæðar ákvarðanir.“ Þ.e., eftir að yfirstjórn CBS sagði honum að hann yrði að skrúfa niður í vinstri áróðrinum og hætta að segja lygar í þágu Demókrata, þá, já, varð honum „ljóst að mér yrði ekki leyft að stýra þættinum eins og ég hef alltaf gert… út frá því sem væri rétt fyrir 60 mínútur, rétt fyrir áhorfendur.“
Vinstrisinnarnir, sem „cos“ leika fréttamenn á hefðbundnum fjölmiðlum, telja að það sem rétt er fyrir fjölmiðla og áhorfendur, sé að flytja vók rugl og áróður í verktöku fyrir vinstrisinna og Demókrata. Áhorfendur eru hinsvegar, eins og Maher sagði „bara orðnir algjörlega þreyttir á því.“
Íris Erlingsdóttir
Höfundur er fjölmiðlafræðingur.