Anna Paulina Luna, þingkona Repúblikanaflokksins, tilkynnir nú að hún muni óska eftir því við Marco Rubio, utanríkisráðherra Bandaríkjanna, að þýskir stjórnmálamenn sem styðja bann við AfD verði settir í komubann. Til þess kæmi ef flokkurinn yrði bannaður.
Anna Paulina Luna, sem situr á Bandaríkjaþingi fyrir Flórída, hefur sent fjögurra síðna umsögn til nefndar á ríkisþingi Þýringalands. AfD hafði óskað eftir áliti hennar fyrir nefndarfund um tillögu Vinstriflokksins þar í ríkinu um að hefja málsmeðferð til að banna flokkinn, að því er Junge Freiheit greinir frá.
„Ef þið bannið AfD mun ég ræða við Rubio ráðherra og óska eftir komubanni fyrir alla þingmenn sem lögðu tillöguna fram og þá sem styðja hana,“ skrifar Luna.
Hún telur að engin „sannfærandi sönnunargögn“ liggi fyrir um að AfD vilji afnema „stjórnskipunina“ og geti hrint slíkri áætlun í framkvæmd. Luna skrifar jafnframt að hún hafi fengið þá mynd að stuðningsmenn bannsins reyni að ryðja óæskilegum pólitískum keppinauti úr vegi með aðstoð leyniþjónustunnar.
Vinstriflokkurinn í Þýringalandi lýsir yfirlýsingu Lunu sem tilraun til að hræða þingmenn og spilla fyrir nefndarfundinum. Katharina König-Preuss, þingmaður flokksins, segir að þýska utanríkisráðuneytið, forseti ríkisþingsins og aðalræðisskrifstofa Bandaríkjanna hafi verið upplýst um málið. Í yfirlýsingu skrifar hún að þingmenn verði að geta tekið ákvarðanir án þess að eiga á hættu að verða persónulega beittir viðurlögum erlendis frá.
„Við ætlum ekki að láta slíkar yfirlýsingar þrýsta á okkur, hvorki á nefndarfundinum né þegar þingið tekur ákvörðun,“ skrifar Katharina König-Preuss.
Daniel Haseloff, varaformaður þingflokks AfD á ríkisþingi Þýringalands, fagnar stuðningi Önnu Paulinu Lunu og krefst sannana fyrir því að flokkurinn hyggist afnema hina frjálsu og lýðræðislegu stjórnskipun.
„Slagorð og tilhæfulausar ásakanir koma ekki í stað slíkra sannana,“ skrifar hann.