Æðsti leiðtogi Írans, Ali Khamenei, varar Donald Trump við alvarlegum afleiðingum ef Bandaríkin kjósa að styðja Ísrael hernaðarlega í stríðinu við Íran. Í yfirlýsingu sem lesin var upp í íranska sjónvarpinu var Bandaríkjunum hótað „óbætanlegu tjóni“ ef þeir sendu hermenn á vettvang.
Í dag, miðvikudag, las sjónvarpsmaður upp skrifleg skilaboð Khamenis til írönsku þjóðarinnar eftir að Ísrael hóf stórfellda loftárásarherferð gegn skotmörkum í Íran síðast liðinn föstudag. Boðskapurinn var meðal annars:
„Gáfaðir einstaklingar sem þekkja til sögu Írans tala ekki til þessarar þjóðar með hótunum, því hún mun ekki gefast upp.“
Yfirlýsingin kemur eftir að Donald Trump krafðist „skilyrðislausrar uppgjafar“ Írans og sagði opinberlega að hann vissi nákvæmlega hvar Khameni væri og „að minnsta kosti í bili“ yrði hann ekki drepinn.
Á meðan stigmagnast átökin. Ísrael segist hafa ráðist á yfir 1.000 skotmörk í Íran, þar á meðal kjarnorkuver og eldflaugastöðvar. Íran hefur svarað með stórfelldum eldflaugaárásum á bæði borgaraleg og hernaðarleg skotmörk í Ísrael, að því er Times of Israel greinir frá.
Ali Bahreini, sendiherra Írans hjá Sameinuðu þjóðunum í Genf, sagði í ræðu hjá mannréttindaráði Sameinuðu þjóðanna að yfirlýsingar Trumps væru „algjörlega tilefnislausar og mjög fjandsamlegar.“ Bahreini sagði:
„Við hunsum ekki það sem hann segir. Við tökum það til greina í útreikningum okkar og mati. Íran mun bregðast við af fullum þunga.“
Bahreini lýsti árásum Ísraels á kjarnorkuver Írans sem „stríði gegn mannkyninu“ og sakaði vesturlönd um að horfa fram hjá árásunum:
„Við heyrum næstum ekkert frá þessum sjálfskipuðu mannréttindafrömuðum“ sagði hann og varaði við „hættulegum leka“ frá kjarnorkuverum.
Alþjóðakjarnorkumálastofnunin (IAEA) hefur staðfest að Ísrael hafi gert árásir á bæði kjarnorkuverið í Natanz og aðrar í Isfahan og segir að geislun hafi enn ekki aukist á nærliggjandi svæðum.
Trump hefur ekki tilkynnt neina ákvörðun enn um beina þátttöku Bandaríkjanna, en sagt er að hann íhugi að Bandaríkjunum taki þátt í áframhaldandi loftárásum Ísraelshers.