Valkostur fyrir Þýskaland, Alternativ für Deutschland, AfD, vill að Þýskaland yfirgefi bæði evrusamstarfið og Schengen-svæðið fái flokkurinn að mynda ríkisstjórn. Á sama tíma vex fylgi flokksins hratt fyrir nokkrar mikilvægar fylkiskosningar og mælist AfD nú með fylgi sem gæti gert hann að stærsta stjórnmálaafli Þýskalands.
Alice Weidel, formaður AfD, kynnti kröfurnar í viðtali við þýsku sjónvarpsstöðina ZDF. Hún sagði efnahag Þýskalands hafa staðið betur áður en evran var tekin upp og telur sameiginlega gjaldmiðilinn hafa veikt þýska hagkerfið og dregið úr velmegun heimilanna.
Flokkurinn vill einnig yfirgefa Schengen-svæðið og taka aftur upp mun strangara eftirlit á landamærum Þýskalands. Weidel sagði að ríkisstjórn undir forystu AfD myndi loka landamærunum og ganga úr Schengen. Flokkurinn vill jafnframt fjölga brottvísunum og draga úr möguleikum fólks til að öðlast þýskan ríkisborgararétt. AfD vill meðal annars að Sýrlendingar, sem ekki hafa lengur forsendur til alþjóðlegrar verndar, snúi aftur til Sýrlands.
Loftslags- og orkustefnan myndi einnig taka miklum breytingum. Weidel ítrekaði andstöðu AfD við fyrirhugað bann við sölu nýrra bifreiða með brunahreyflum og hafnaði aðgerðum sem beinast gegn loftslagsbreytingum af mannavöldum.
Yfirlýsingarnar koma fram á sama tíma og AfD mælist með mikið fylgi í skoðanakönnunum. Í nýjustu landskönnun Forschungsgruppe Wahlen fær flokkurinn 27% fylgi, samanborið við 22% hjá CDU/CSU. AfD mælist þar með stærri en bandalag kristilegu flokkanna.
Fylgið er enn meira í Saxlandi-Anhalt, þar sem fylkiskosningar fara fram 6. september. AfD mælist þar með um eða yfir 40% fylgi í nokkrum könnunum. Reuters greindi nýlega frá könnun þar sem flokkurinn fékk 41% fylgi en CDU 24%.
Slík niðurstaða gæti gert AfD kleift að mynda fylkisstjórn án aðkomu annarra flokka. Það yrði sögulegt pólitískt gegnumbrot fyrir flokkinn.
Neita samstarfi
Velgengni AfD hefur jafnframt hert átökin milli flokksins og hinna hefðbundnu stjórnmálaflokka. CDU hefur haldið fast við svonefndan „Brandmauer“, eða eldvegg, sem felur í sér að flokkurinn neitar að eiga samstarf við AfD.
Weidel heldur því fram að þessi stefna styrki flokk hennar og hefur sagt að AfD muni fyrst ná völdum í einstökum sambandslöndum og síðan á landsvísu.
Jafnframt hafa komið fram kröfur um að ganga lengra og reyna að banna AfD. Umræðan um flokksbann hefur færst í aukana á ný í Þýskalandi. Stuðningsmenn banns telja flokkinn ógna lýðræðis- og stjórnskipun landsins. Meira en eitt þúsund lögfræðingar hafa hvatt ríkisstjórnina og þingið til að grípa til aðgerða.
Jafnaðarmannaflokkurinn SPD hefur einnig stutt lögfræðilega greinargerð þar sem því er haldið fram að AfD vinni að því að grafa undan lýðræðisskipulaginu.
Andstaða við bann er þó einnig töluverð, meðal annars innan hinna hefðbundnu flokka. CDU hefur varað við því að misheppnuð tilraun til að banna AfD gæti styrkt ímynd flokksins sem fórnarlambs pólitískra ofsókna og þannig orðið honum til framdráttar.
Umræðan er því ekki lengur aðeins lagalegs eðlis heldur einnig stefnumótandi. Spurningin er hvort bann myndi veikja AfD eða þvert á móti afla flokknum enn meira fylgis.
Deilt um nafngiftina
Umræðan hefur orðið enn flóknari eftir að dómstóll stöðvaði í febrúar flokkun þýsku leyniþjónustunnar á AfD sem „staðfestum hægriöfgasamtökum“ þar til endanleg niðurstaða liggur fyrir. AfD túlkaði úrskurðinn sem sigur fyrir réttarríkið.
Nýleg könnun ZDF sýnir þó að meirihluti Þjóðverja er enn andvígur fylkisstjórn undir forystu AfD í austurhluta Þýskalands. Alls sögðust 64% ekki vilja sjá stjórnmálamann frá AfD verða forsætisráðherra fylkis, en 23% voru því fylgjandi. Þá töldu 61% að sú ákvörðun CDU að neita samstarfi við AfD væri rétt.
AfD stendur því frammi fyrir mikilvægu pólitísku prófi. Á skömmum tíma hefur flokkurinn farið frá því að vera einangraður af hinum hefðbundnu flokkum yfir í að mælast stærstur í nokkrum skoðanakönnunum.
Haldi fylgistölurnar sér gætu kosningarnar í Saxlandi-Anhalt 6. september orðið fyrsta skrefið í átt að því að AfD fái raunverulegt tækifæri til að stjórna þýsku sambandslandi. Á sama tíma heldur umræðan um hugsanlegt bann við flokknum áfram.